ەلباسى: 2050-جىلى تۇركىستان تۇرعىندارىنىڭ سانى 500 مىڭعا جەتۋى ءتيىس

«استانانى سالعان قاراجات باياعىدا ءوزىن-ءوزى اقتادى، قازىر بۇل قالا بيۋجەتىنە اقشا قۇياتىن دونور بولدى. سول سياقتى ءبىرىنشى كەزەڭدە تۇركىستانعا 350 ميلليارد تەڭگە اقشا جۇمسالاتىن بولدى. ونىڭ 50 پايىزىن جەكە مەنشىكتەر بيزنەس رەتىندە سالىپ جاتىر. سوندىقتان ونىڭ اۋىرتپاشىلىعى بولمايدى دەپ ويلايمىن. بۇل دا ءبىر ۇلكەن قالا بولعان سوڭ، بارلىعى اتسالىسادى. سەبەبى تۇركىستاننىڭ تۇرعان جەرى - قالىڭ جۇرتتىڭ ورتاسى، قازاقتىڭ قايماعى بۇزىلماعان، عۇرىپ-سالتتاردى ساقتايتىن ەلدىڭ ورتاسى»، - دەدى ن. نازاربايەۆ.

ونىڭ ايتۋىنشا، وبلىس ورتالىعى اتانعان ەكى جىلدا 160 نىساننىڭ جارتىسى سالىنىپ ءبىتتى. ونىڭ ىشىندە اكىمشىلىك عيماراتى، قازاق دراما تەاترى، كونگرەسسس-حول، 10 مىڭ ورىندىق ستاديون، جاستار سارايى بار. باس جوسپارعا ساي 2050 -جىلى تۇركىستان تۇرعىندارىنىڭ سانى 500 مىڭعا جەتۋى ءتيىس.

بۇعان دەيىن ن. نازاربايەۆ «ەل استاناسىنىڭ تۇركىستانعا كوشۋى مۇمكىن بە؟» دەگەن سۇراققا جاۋاپ بەرگەن ەدى. سونىمەن بىرگە، تۇركىستاننان تاشكەنتە تەمىر جول سالىنىپ، سامارقان، بۇقارا، تاشكەنت، شىمكەنت، تۇركىستان قالالارىنان ۇلكەن شەڭبەر جاسالماق.