USD 429.57 EUR 447.35
RUB 6.94 CNY 63.23
جاڭالىقتار

بەيجىڭ-2022: ءار سپورتشىنىڭ ارمانى جەڭىس تۇعىرىنان كورىنۋ - كەنجەش سارسەكەنوۆا

26 قاڭتار 18:29
:ءبولىسۋ
بەيجىڭ-2022: ءار سپورتشىنىڭ ارمانى جەڭىس تۇعىرىنان كورىنۋ - كەنجەش سارسەكەنوۆا

نۇر-سۇلتان. قازاقپارات - بەيجىڭدە وتەتىن XXIV قىسقى وليمپيادا ويىندارىنىڭ الاۋى تۇتانۋعا جاقىن.

وسى ورايدا كونكيمەن جۇگىرۋ سپورتىنان قازاقستان رەسپۋبليكاسىنىڭ مەملەكەتتىك جاتتىقتىرۋشىسى كەنجەش سارسەكەنوۆا قازاقپارات تىلشىسىنە شاعىن سۇحبات بەردى.

- كەنجەش سادىق قىزى، بيىلعى جىلدىڭ باستى دوداسى «بەيجىڭ-2022» وليمپياداسىنىڭ باستالۋىنا ساناۋلى كۇندەر قالدى. كونكيمەن جۇگىرۋ سپورتىنان قازاقستان رەسپۋبليكاسىنىڭ مەملەكەتتىك جاتتىقتىرۋشىسى رەتىندە شاكىرتتەرىڭىزدەن قانداي جۇلدە كۇتەسىز؟

- كونكيمەن جۇگىرۋ سپورتىنان ەلىمىزدىڭ نامىسىن 5 سپورتشى قورعايدى. ولاردىڭ كىمدەر ەكەنىن وزدەرىڭىز جاقسى بىلەسىزدەر. ارينە، وليمپياداعا قاتىسقان ءار سپورتشىنىڭ ارمانى جەڭىس تۇعىرىنان كورىنۋ. ءبىزدىڭ ءۇمىتىمىز ولاردى سول بيىكتەن كورۋ. سونداقتان ءار سپورتشى ءوزىنىڭ جاۋاپكەرشىلىگىن جاقسى تۇسىنەدى. جۇلدەلى ورىندار ءۇشىن بار كۇش-جىگەرىن سالادى دەپ سەنەمىن. بارلىق سپورتشىلاردان جۇلدە كۇتەمىز.

- ءوزىڭىز بىلەسىز جاڭا جىل وتە سالا ەلىمىزدە جاپپاي تارتىپسىزدىكتەر ورىن الدى. بۇل «قاڭتار وقيعاسى» سپورتشىلارىمىزدىڭ دايىندىعىنا كەرى اسەرىن تيگىزگەن جوق پا؟

- وليمپيادا ويىندارىنا دايىندىق ەلوردامىزداعى «الاۋ» مۇز ايدىنىندا وتۋدە. قۇراما كوماندانىڭ باس باپكەرى دميتري بابەنكونىڭ جوسپارى بويىنشا ءوتىپ جاتىر. ەلىمىزدە بولعان «تارتىپسىزدىكتەر» ءبىزدىڭ سپورتشىلارىمىزدىڭ وليمپياداعا دايىندالۋىنا، جاتتىعۋ جاساۋىنا، ۋاقىتىلى دەمالۋىنا ەشقانداي كەرى اسەرىن تيگىزگەن جوق.

- قىسقى وليمپيادا ويىندارىنداعى جەتىستىكتەرىمىزگە كوپ جاعدايدا جانكۇيەرلەرىمىزدىڭ كوڭىلى تولماي جاتادى. ەلمىزدە جالپى قىسقى سپورت تۇرلەرىنىڭ دامۋىنا قانداي باعا بەرەسىز؟

- ەلىمىزدە قىسقى سپورت تۇرلەرىنىڭ دامۋ بارىسى، ارينە جازعى سپورت تۇرلەرىنە قاراعاندا كەنجەلەپ كەلەدى. مىسالى، كەزىندە ءوزىم اينالىسقان كونكيمەن جۇگىرۋ سپورتى تۋرالى ايتار بولسام، سپورتتىڭ بۇل ءتۇرى دە قاتتى دامىپ كەتكەن جوق. وعان باستى سەبەپ - سپورتشىلار جاتتىعۋ جاسايتىن، سپورتتىق بازانىڭ ازدىعى. بىزگە ەلىمىزدىڭ ءار وڭىرىندە زاماناۋي جابىق مۇز الاڭى كەرەك. ەگەردە، وڭىرلەردىڭ باس قالالارىندا جابىق مۇز الاڭىن سالماساق، بۇل سپورتتىڭ دامۋى كەشەۋىلدەي بەرەدى. مەملەكەت وسى جاعىنا كوڭىل بولسە دەپ ويلايمىن. قازىر دە قۇرامادا كوپتەگەن تالانتتى سپورتشىلارىمىز جەتەرلىك. سول سپورتشىلارىمىزدى باعالاپ، ساقتاي بىلسەك، سونداي-اق، بولاشاق چەمپيونداردى شىعارۋعا كۇنى بۇگىننەن باستاپ كىرىسسەك سپورتتى دامىتۋعا بولادى.

- الداعى وليمپيادا دا كىمدەرگە ءۇمىت ارتاسىز؟

- ءار سپورتشى جەڭىستەن ءۇمىتتى. سوندىقتان ەشكىمدى بولە جارماي بارلىعىنان ءۇمىت كۇتەمىن. بارلىق وليمپياداشىلارعا تەك ساتتىلىك سەرىك بولسىن دەپ تىلەيمىن. بايراعىمىزدى جەلبىرەتىپ بارىپ، جەلبىرەتىپ وتانىمىزعا ورالۋعا ءناسىپ ەتسىن. «العا قازاقستان!»، «العا قازاق سپورتشىلارى» دەگەن تىلەگىمدى جەتكىزگىم كەلەدى.

كەنجەش سارسەكەنوۆا:

1972-جىلى تۋعان. جاس ءوسپىرىم قىزدار اراسىنداعى قازاقستاننىڭ، الەمنىڭ ەكى مارتە چەمپيونى، 1994-جىلى ليللەحاممەردە (نورۆەگيا)، 1994-جىلى ناگانو (جاپونيا) قىسقى وليمپيا ويىندارىنا قاتىسۋشى، قىسقى ازيا ويىندارىنا (1999، وڭتۇستىك كورەيا) قاتىسىپ، 1500 م- گە سىرعاناۋدان 8- ءشى، كوپسايىستا 9-شى ورىنعا يە بولعان. الەم كۋبوگىنىڭ كەزەڭدەرىنە، نورۆەگيا، گوللانديا، گەرمانيادا وتكەن حالىقارالىق تۋرنيرلەرگە قاتىسقان. كونكيدە جۇگىرۋدەن سپورت شەبەرى، ەكى دۇركىن قىسقى وليمپياداعا قاتىسۋشى، 7 دۇركىن ق ر چەمپيونى.

اۆتور: كۇنسۇلتان وتارباي


:ءبولىسۋ
سونداي-اق... وقىڭىز
پئكئر قالدئرؤ
+7
جئبةرؤ

مۇراعات