«ايبىن-2020» اسكەري-پاتريوتتىق جيىنى اياقتالدى

باسپا ءسوز قىزمەتىنىڭ مالىمەتتەرىنە قاراعاندا، بۇل ءراسىم بەينەبايلانىس ارقىلى قازاقستاننىڭ بارلىق وڭىرىندە ونلاين تۇردە كورسەتىلىپ، سونىڭ ارقاسىندا جيىنعا قاتىسۋشىلار تىكەلەي ەفيردەن باقىلاۋعا مۇمكىندىك الدى.

اتالعان ءىس-شاراعا قورعانىس ءمينيسترى گەنەرال-لەيتەنانت نۇرلان ەرمەكبايەۆ، اقپارات جانە قوعامدىق دامۋ ءمينيسترى ايدا بالايەۆا، ءبىلىم جانە عىلىم ۆيتسە-ءمينيسترى شولپان كارينوۆا، جەكە سىناقتا جانە «ۇزدىك جاس سارباز» اتالىمى بويىنشا ۇزدىك كوماندا كاپيتاندارى، جيىننىڭ جەڭىمپازدارى قاتىستى.

رەسپۋبليكالىق جيىن ەكى اي بويى ءوتتى. ونلاين-فورماتتا 39 كوماندا جارىستى. جالپى قاتىسۋشىلار سانى 585 ادامدى قۇرادى. جيىننىڭ كونكۋرستارىنا اسكەري قولدانبالى سپورت تۇرلەرى، ينتەللەكتۋالدىق جانە شىعارماشىلىق جارىستار كىردى.

«مەن جەڭىمپازداردى قۇتتىقتايمىن. بارلىق قاتىسۋشىلارعا جەڭىسكە دەگەن ۇمتىلىسى ءۇشىن العىس بىلدىرەمىن. سىزدەر ءبارىڭىز اسكەري ىسپەن تانىسىپ، ارميا مەن قارۋلى كۇشتەردىڭ تاريحى تۋرالى بىلدىڭىزدەر، جەتىستىكتەرىڭىزدى، بىلىمدەرىڭىز بەن ەپتىلىكتەرىڭىزدى كورسەتتىڭىزدەر، جاڭا دوستار تاپتىڭىزدار، وزدەرىڭىزدى سىناپ كوردىڭىزدەر»، - دەدى نۇرلان ەرمەكبايەۆ.

شىعىس قازاقستان وبلىسىنىڭ، تىل جانە قارۋ-جاراق باستىعى باسقارماسىنىڭ، سونداي-اق نۇر-سۇلتان قالاسىنداعى «جاس ۇلان» رەسپۋبليكالىق مەكتەبىنىڭ كوماندالارى ءوز اتالىمدارىندا ۇزدىك اتاندى.

تىل جانە قارۋ-جاراق باستىعى باسقارماسىنىڭ «ساعادات» كومانداسى جيىننىڭ ابسوليۋتتى گران- پري جەڭىمپازى اتاندى. جەڭىمپاز كوماندالار كۋبوكتارمەن، مەدالدارمەن، ديپلومدارمەن جانە قۇندى سىيلىقتارمەن ماراپاتتالدى. ءار كونكۋرسانت قاتىسقانى تۋرالى سەرتيفيكات الدى.

«جىل سايىنعى جيىن - بۇل ءبىز ءۇشىن جاڭا تاجىريبە، جاڭا دوستار، جاڭا اسەرلەر. قاشىقتىقتاعى فورماتتا وتۋىنە قاراماستان، كونكۋرس وتە قىزىقتى، ءارى تارتىمدى بولدى. بۇل جيىن ءبىزدىڭ جۇرەگىمىزدە وتانعا دەگەن سۇيىسپەنشىلىكتىڭ وتىن جاقتى. ءبىزدى جىل سايىن وتە جوعارى دەڭگەيدە وتەتىن وسىنداي اۋقىمدى شارالارعا قاتىسۋعا مۇمكىندىكتىڭ بولۋى قۋانتادى»، - دەپ شىعىس قازاقستان وبلىسى «جاس قىران» كومانداسىنىڭ كاپيتانى اجار ىقىلاسوۆا ءوز اسەرىمەن ءبولىستى.