ءۇندىستان مەن بانگلادەشتە سۇراپىل تايفۋننان 2,5 ميلليون ادام ەۆاكۋاتسيالانعان
جەل ەكپىنى ساعاتىنا 190 شاقىرىمعا جەتكەن. ءۇندىستاننىڭ باتىس بەنگاليا شتاتىندا قۇلاعان اعاشتىڭ استىندا قالعان ەكى ايەل قازا تاپتى. ال بانگلادەشتە ءبىر ادام اپات قۇربانى بولدى.
ءۇندىستان جاعالاۋلارىندا تۇراتىن 450 مىڭ ادام، ال بانگلادەشتە ەكى ميلليوننان استام ادام قاۋىپسىز جەرگە ەۆاكۋاتسيالانعان.
ەكى ەلدە دە ەۆاكۋاتسيا كەزىندە قاۋىپسىزدىك تالاپتارى ساقتالدى. كەي تۇرعىندار كوروناۆيرۋس جۇقتىرۋدان قورقىپ، ۋاقىتشا باسپانادان باس تارتقان. حالىقارالىق قىزىل جارتى اي قوعامىنىڭ بانگلادەشتەگى ءبولىمىنىڭ جەتەكشىسى ازمات ۋللا مۇنداي كەزدە ەۆاكۋاتسيا ۇلكەن پروبلەما ەكەنىن ايتادى.
«ول ءۇشىن ءبىز جەرگىلىكتى بيلىكپەن تىعىز ىنتىماقتاستىقتا جۇمىس ىستەدىك. ولار بىزگە بىرنەشە عيمارات تاۋىپ بەردى. الەۋمەتتىك اراقاشىقتى ساقتاۋ ءۇشىن بۇل ماڭىزدى. ءبىز ونى ساقتاۋعا بار كۇش-جىگەرىمىزدى سالدىق. ءبىزدىڭ باستى مىندەتىمىز - ادامداردىڭ ءومىرىن امان الىپ قالۋ»، - دەيدى ول.
قايىرىمدىلىق ۇيىمدارى ميلليونداعان روحيندجا بوسقىندارىنىڭ جاعدايىنا الاڭداۋلى. ويتكەنى ولار تۇراتىن جەردەن كوروناۆيرۋس ينفەكتسياسى تابىلعان. ءۇندىستان مەن بانگلادەشتە سوڭعى 20 جىلداعى ەڭ سۇراپىل تايفۋن باتىس بەنگاليا شتاتىنىڭ استاناسى كالكۋتتاعا جەتىپ، جەلدەن اعاشتار مەن باعاندار قۇلاعان. قالادا جارىق ءسونىپ قالدى.