ەكولوگ: كيىكتىڭ سانى 1 ميلليونعا جەتتى

قازىر دالادا اقبوكەن تولدەپ، قۇرالايدىڭ سالقىنى باستالدى. يەن دالادا وسى كيىكتىڭ قۇرالايىن كورىپ، جاڭا ازىردە عانا جولدان ورالعان تابيعات جاناشىرىمەن ءتىلشىمىز تىلدەسىپ قايتقان ەدى. نۇرشاپاعات نەسىپبايەۆ، ءتىلشى:

- دالادا كيىك تولدەپ جاتىر. كوكتەمنىڭ مامىراجاي شاعى تۋىپ، قوزى- لاق وتىعا باستاعان وسى ساتتە اياق استىنان دالادا ىزعار ەسىپ، جاۋىن جاۋاتىنى بار. ءدال وسى ءساتتى قازاق قۇرالايدىڭ سالقىنى دەپ اتايدى. قازىر قاراعاندى، ماڭعىستاۋ، اقمولا، قوستاناي، باتىس، شىعىس جانە سولتۇستىك قازاقستان وبلىستارىنىڭ كەي اۋداندارىندا جاۋىن جاۋىپ، جەلدىڭ ەكپىنى سەكۋندىنا 20 مەترگە دەيىن جەتتى. اقبوكەندەر وسى سۋىق كەزىندە جاپپاي تولدەپ، قۇرالايىن ورگىزەدى.

ەرتە داۋىردەن باستاپ ادام بالاسىمەن بىرگە جاساسىپ كەلە جاتقان كيىك بالاسىنىڭ سانى 80-جىلدارى 2 ميلليونعا دەيىن جەتكەن. ال 90 -جىلداردىڭ باسىندا يەن دالادا نەبارى 20 مىڭ باستاي عانا قالدى. 2008 -جىلعى ساناقتا 58 مىڭ بولىپ، ودان كەيىن كوبەيە تۇسكەن.

2015 -جىلى 295 مىڭ 500 گە جەتسە، 2016 -جىلعى ساناقتا ءتۇز تاعىسى كۇرت ازايىپ، ماماندار تەك 108 مىڭ 300 باس كيىكتى ساناعان. ودان كەيىن قايتا ۇلعايىپ 2018 -جىلى 215 مىڭ 100 گە جەتتى. 2019 -جىلداعى ساناق بويىنشا 334 مىڭ 400. بىلتىر پاندەمياعا بايلانىستى ساناق جۇرگىزىلمەدى. دەگەنمەن، بيىل تابيعات جاناشىرلارى كيىك سانىنىڭ اناعۇرلىم كوبەيگەنىن ايتىپ وتىر. ەكولوگ ساكەن دىلداحمەتتىڭ بولجاۋىنشا اقبوكەننىڭ جالپى سانى قازىر 1 ميلليونعا جەتىپ قالعان.

ساكەن دىلداحمەت، ەكولوگ:

- بيىلعى كيىك ساناعىنىڭ ناقتى قورىتىندىسى كەلەسى ايدا جاريا ەتىلەدى. ايتا كەتەيىك، ەندىڭ عانا باۋىرىن كوتەرىپ جاتقان قۇرالايلار ساناققا الىنبايدى. تەك كەلەر جىلى عانا ەسەپكە كىرەدى.