قىتاي «تيانۆەن-1» زوندىن مارستىڭ تۇراق وربيتاسىنا ءساتتى شىعاردى

بۇل تۋرالى سارسەنبى كۇنى ق ح ر مەملەكەتتىك عارىش باسقارماسىنىڭ مالىمەتىندە ايتىلدى، دەپ حابارلايدى قازاقپارات مەنشىكتى ءتىلشىسى.

«24-اقپاندا ساعات 06:29 دا قىتايلىق «تيانۆەن-1» وربيتالىق مانيەۆر جاساعاننان كەيىن مارستىڭ تۇراق وربيتاسىنا ءساتتى شىقتى»، - دەلىنگەن مالىمدەمەدە.

زوند قۇرامى وربيتالىق اپپارات، قونۋ مودۋلى جانە مارسوحودتان تۇرادى. روۆەرى بار قونۋ مودۋلى مارسقا بيىلعى جىلدىڭ مامىر نەمەسە ماۋسىم ايلارىندا قونۋى كەرەك.

ەسكە سالا كەتەيىك، «تيانۆەن-1» زوندى 2020 -جىلعى 23-شىلدەدە «ۆەنچان» عارىش ايلاعىنان «چانجەن-5» زىمىران- تاسىعىشىنىڭ كومەگىمەن عارىشقا ۇشىرىلدى. بۇعان دەيىن ق ح ر عارىشتىق باسقارۋ مەملەكەتتىك كوميتەتىندە مالىمدەگەندەي، ميسسيانىڭ عىلىمي ماقساتتارىنىڭ ءبىرى - مارس بەتىنىڭ مورفولوگياسى مەن گەولوگيالىق سيپاتتامالارىن، اتموسفەرالىق يونوسفەرانى جانە قورشاعان ورتانىڭ تابيعاتىن، فيزيكالىق ورىستەر جانە پلانەتانىڭ ىشكى قۇرىلىمىن زەرتتەۋ.

ەسكە سالا كەتسەك، 19-اقپان كۇنى امەريكانىڭ اەروناۆتيكا جانە عارىش كەڭىستىگىن زەرتتەۋ جونىندەگى ۇلتتىق باسقارماسى (NASA) مارسقا Perseverance (پەرسيەۆەرانس) روۆەرىن قوندىردى. روۆەردىڭ قىزىل عالامشارداعى باستى مىندەتى - تىرشىلىك بەلگىسىن ىزدەۋ. كەيىننەن NASA مارسوحودتىڭ قىزىل عالامشار بەتىنە قونعان اسەرلى ۆيدەوسىن جاريالادى.

اۆتور: اياۋلىم التىنبەك