تەڭىز كەنىشىندە كوروناۆيرۋس جۇقتىرعاندار 1 مىڭعا جۋىقتادى: كاسىپورىن جابىلۋى مۇمكىن

None
None
نۇر- سۇلتان. قازاقپارات - اتىراۋ وبلىسىنداعى تەڭىز كەنىشىندە 935 ادام كوروناۆيرۋس جۇقتىردى. بۇل تۋرالى ق ر مەملەكەتتىك باس سانيتارلىق دارىگەرى ايجان ەسماعامبەتوۆا ايتتى، دەپ حابارلايدى قازاقپارات ءتىلشىسى.

«ىندەتكە شالدىعۋ كورسەتكىشىنىڭ وسىمىنە جابىق ۇجىمدارداعى ناۋقاستار سانىنىڭ ارتۋى سەبەپ بولىپ وتىر. بۇگىنگى كۇنى 935 جاعداي تىركەلگەن تەڭىز كەنىشىندە سىرقاتتانۋشىلاردىڭ ارتۋى بايقالادى. شىمكەنتتە دە «PetroKazakhstan Oil Production» ج ش س قىزمەتكەرلەرى اراسىندا جاپپاي سىرقاتتانۋ تىركەلدى. كومپانيا قىزمەتكەرلەرى اراسىندا 101 جاعداي، مەردىگەر ۇيىمداردا - 23 جانە ءۇي وشاقتارىندا بايلانىستا بولعاندار اراسىندا 69 جاعداي تىركەلىپ وتىر. قاراعاندى وبلىسىندا «قازاقمىس» كوروپوراتسياسى كەنىشتەرىنىڭ بىرىندە 34 جاعداي تىركەلدى»، - دەدى بۇگىن ەلىمىزدىڭ باس سانيتارلىق دارىگەرى ورتالىق كوممۋنيكاتسيالار قىزمەتىندەگى بريفينگتە.

ونىڭ اتاپ وتۋىنشە، تەڭىز كەنىشىندە سىرقاتتانۋدىڭ ارتۋىنا بايلانىستى اتىراۋ وبلىسىنا ۇكىمەتتىك كوميسسيا جىبەرىلگەن. كوميسسيا شەشىمىمەن اتالعان كەنىشتە كوروناۆيرۋستىڭ الدىن الۋعا باعىتتالعان جۇمىستاردىڭ جوسپارى، كەستەسى قابىلداندى.

«قازىرگى ۋاقىتتا اتالعان جوسپاردىڭ، كەستەنىڭ ورىندالۋىنا باقىلاۋ جۇرگىزۋ قاجەت. ولاي بولماعان جاعدايدا، ناۋقاستار سانىنىڭ ارتۋىنا بايلانىستى وقشاۋلانۋعا جانە كاسىپورىننىڭ وزدىگىنەن نە ءماجبۇرلى تۇردە جابىلۋىنا الىپ كەلەدى»، - دەدى ايجان ەسماعامبەتوۆا.

اۆتور: مارلان جيەمباي

سوڭعى جاڭالىقتار