وقۋلىقتاردا 1921-1922 -جىلدارداعى اشتىققا بايلانىستى ماتەريال جوقتىڭ قاسى - عالىم

مۇنداي پىكىردى ش. ءۋاليحانوۆ اتىنداعى تاريح جانە ەتنولوگيا ينستيتۋتىنىڭ ديرەكتورى، تاريح عىلىمدارىنىڭ دوكتورى، پروفەسسور زيابەك قابىلدينوۆ ءبىلدىردى، دەپ حابارلايدى قازاقپارات ءتىلشىسى.

«بيىل 1921-1922 -جىلدارداعى جاپپاي اشارشىلىق باستالعانىنا 100 جىل تولادى. 1921-1922 -جىلدارداعى اشارشىلىق جانە ونىڭ سالدارى ءبىرقاتار مۇراعات قورلارىنىڭ جابىقتىعىنا بايلانىستى عىلىمي تۇرعىدا زەرتتەلمەگەن. سوعان وراي مەكتەپ جانە ۋنيۆەرسيتەت وقۋلىقتارىندا 1921-1922 -جىلدارداعى اشتىققا بايلانىستى ماتەريالدار جوقتىڭ قاسى»، - دەدى عالىم.

وسىعان بايلانىستى زيابەك قابىلدينوۆ اشارشىلىقتىڭ ەكى كەزەڭىنە قاتىستى ارحيۆ قورىنداعى ماتەريالداردى تولىعىمەن اشۋ كەرەكتىگىن ايتادى. ونىڭ اتاپ وتۋىنشە، كەشەندى زەرتتەۋلەردىڭ قورىتىندىلارى مەكتەپ جانە جوعارى وقۋ ورىندارىنىڭ وقۋلىقتارىندا بەرىلۋىمەن قاتار، وزگە تىلدەرگە دە اۋدارىلىپ، شەتەل اۋديتورياسىنا دا ۇسىنىلۋى كەرەك. جالپى، عىلىمي زەرتتەۋ جۇمىستارى قازاقستاننىڭ بارلىق وڭىرىندە جۇرگىزىلۋى كەرەك.

ەستەرىڭىزگە سالا كەتسەك، كەشە «ازاتتىق جولىنداعى اقتاڭداقتار: اشارشىلىق زارداپتارىنا شىنايى تاريحي كوزقاراس» تاقىرىبىنا ارنالعان دوڭگەلەك ۇستەل ءوتتى. وندا ق ر پارلامەنتى سەناتىنىڭ ءتوراعاسى ماۋلەن اشىمبايەۆ اشارشىلىق تاقىرىبىنا قاتىستى جۇيەلى، تاريحي فاكتىلەرگە سۇيەنگەن تەرەڭ ءارى جان- جاقتى زەرتتەۋلەر كەرەك ەكەنىن باسا ايتتى. ول ءۇشىن ءتيىستى ارحيۆ دەرەكتەرىنە قول جەتكىزۋ، ولاردى جۇيەلەۋ جانە مۇقيات زەردەلەۋ، وڭىرلەرمەن جانە ونداعى اشارشىلىق تاقىرىبىن زەرتتەپ جۇرگەن عالىمدارمەن تىعىز بايلانىس ورناتۋ، كورشىلەس ەلدەردىڭ ارحيۆ ماتەريالدارىمەن ءجىتى تانىسۋ، اشارشىلىق كۋاگەرلەرىنىڭ ءتۇرلى ەستەلىكتەرىن جيناقتاۋ قاجەت دەگەن ويىن جەتكىزدى.

اۆتور: مارلان جيەمباي