قۇنى 18 ميلليون تەڭگە بولاتىن اۆتوتيەگىشتى ايداپ اكەتكەن كۇدىكتىلەر ۇستالدى

None
None
نۇر-سۇلتان. قازاقپارات - «بايقوڭىر» اۋداندىق پوليتسيا باسقارماسىنىڭ كريمينالدىق پوليتسيا قىزمەتكەرلەرى قۇنى 18 ميلليون تەڭگە بولاتىن «LW 300 KN» ماركالى اۆتوتيەگىشتى ايداپ اكەتكەن 2 كۇدىكتىنى ۇستادى، دەپ حابارلايدى قازاقپارات ءتىلشىسى.

نۇر-سۇلتان قالالىق پوليتسيا دەپارتامەنتىنىڭ مالىمەتىنشە، قۇقىق قورعاۋ ورگاندارىنا جاۋاپكەرشىلىگى شەكتەۋلى سەرىكتەستەردىڭ ءبىرىنىڭ جۇرگىزۋشىسى جۇگىنىپ، تۇنگى ۋاقىتتا الاش تاسجولى بويىندا قالدىرعان اۆتوتيەگىشىنىڭ ۇرلانعانىن حابارلاعان.

ونىڭ ايتۋىنشا، جۇمىستان كەيىن كولىگىن جول بويىنا قالدىرىپ، ۇيىنە كەتكەن. ال تاڭەرتەڭ كولىكتىڭ ۇرلانعانىن ءبىلىپ، پوليتسياعا جۇگىنگەن.

«جەدەل ىزدەستىرۋ ءىس-شارالارى بارىسىندا پوليتسيا قىزمەتكەرلەرى كولىكتى ايداپ اكەتۋ كۇدىگىمەن قالانىڭ 29 جاستاعى 2 تۇرعىنىن ۇستادى. قاسكۇنەمدەر يەسىز كولىكتى بايقاپ، جاقىن ماڭدا بەينەكامەرالاردىڭ جانە بوگدە ادامداردىڭ جوقتىعىن پايدالانىپ، اۆتوتيەگىشتى ايداپ اكەتكەن. كۇدىكتىلەر ۇرلانعان كولىكتى ءتۇن ۋاقىتىندا قالا ماڭىنداعى اۋىلداردىڭ بىرىنە جاسىرعان. ولار اۆتوتيەگىشتى باسقا قالاداعى ساتىپ الۋشىعا 6 ميلليون تەڭگەگە ساۋدالاماق بولعان. بۇل ءۇشىن ولار ۇزىن ولشەمدى جۇك كولىگىنىڭ جۇرگىزۋشىسىمەن اۆتوتيەگىشتى تاسىمالداۋعا ۋاعدالاسقان»، - دەپ اتاپ وتەدى دەپارتامەنتتەن.

ۆەدومستۆو اقپاراتىنا سايكەس، قازىرگى ۋاقىتتا اتالعان فاكتى بويىنشا قىلمىستىق ءىس قوزعالدى.

كۇدىكتىلەر قالالىق پوليتسيا دەپارتامەنتىنىڭ ۋاقىتشا وقشاۋلاعىشىنا قامالدى. ولاردىڭ ەلوردا اۋماعىندا جاسالعان وسىنداي قىلمىستارعا قاتىسى تەكسەرىلىپ جاتىر.

سوڭعى جاڭالىقتار