نەگە كامەلەت جاسى - 18؟

زاڭعا سايكەس، كامەلەت جاسىنا تولعان ادام تولىقتاي ازاماتتىق قۇقىققا يە بولىپ، ءوز ىسىنە جاۋاپكەرشىلىك الادى. ءبىراق، نەگە ءدال 18 جاس كامەلەتتىك جاس سانالادى؟

تاريحي كوزى:

«كامەلەت جاسى» ۇعىمى 18- عاسىردا ۇلى فرانسۋز توڭكەرىسى كەزىندە تۋعان. ءدال سول ۋاقىتتا «ازامات/ ازاماتشا» دەگەن ۇعىم پايدا بولىپ، وزگە ەلدەرگە تارالا باستادى. ازامات ساناتىنا جۇمىس كۇشىنە جارامدى 18 جاستاعى تۇرعىندار جاتتى. كەيىن بۇل تاجىريبە سوۆەت ۇكىمەتى كەزىندە قولدانىلا باستادى. سودان بەرى كوپتەگەن ەلدەردە كامەلەت جاسى وزگەرە قويعان جوق.

عىلىمي تۇرعىدان:

كامەلەت جاسىن قابىلداماس بۇرىن، زاڭگەرلەر مەديتسينا جانە پسيحولوگيا عالىمدارىنىڭ پىكىرىنە سۇيەنەدى. عىلىمي تۇرعىدان 18 جاستا ادامدار پسيحولوگيالىق جانە فيزيكالىق قالىپتاسۋ كەزەڭدەرىنىڭ باسىم بولىگىنەن ءوتىپ ۇلگەرەدى. مىسالى:

- بالانىڭ كريتيكالىق ويلاۋ داعدىسى تولىعىمەن قالىپتاسادى؛

- ادامداردا ەرىكتى نازار داعدىسى باسىمىراق بولا تۇسەدى؛

- وزىنە عانا ءتان سەكسۋالدى ەرەكشەلىك تولىعىمەن قالىپتاسادى؛

- ادامدا جەكە مورال ۇعىمى قالىپتاسادى؛

- قوعاممەن بايلانىس قالىپتاسادى.

18 جاستا ادام جان-جاقتى ويلاپ، شەشىم قابىلداي الادى. سونىمەن قاتار جاۋاپكەرشىلىك الىپ تا بىلەدى. مەديتسينا بويىنشا بۇل جاستا ىشكى اعزا مەن جۇيەنىڭ قالىپتاسۋى اياقتالادى. ياعني، بۇل ۋاقىتتا جاس بولسا دا، ەرەسەكتەرگە تۇسەتىن كۇشتى كوتەرە الادى، ولارمەن تەڭەسە جۇمىس ىستەي الادى.

زاڭ، عىلىم جانە تاريح 18 جاستا ادام ەسەيەدى دەگەنىنە قاراماستان، ەسەيۋ كەزەڭى ءار ادامدا ءارتۇرلى جۇرەتىنى جاسىرىن ەمەس. 18 جاس - بار بولعانى ورتاشا ستاتيستيككالىق كورسەتكىش. ستەنفورد ۋنيۆەرسيتەتىنىڭ زەرتتەۋشىلەرى مەن جاستارمەن جۇمىس ىستەپ جۇرگەن تۇلەگى دجۋليا ليتكوتت-حەيمس تومەندە كورسەتىلگەن قاسيەتتەر بويىنان تابىلعاندا عانا ءوزىن تولىققاندى ەرەسەك ساناي الادى دەيدى:

- تاۋەكەل ەتىپ بىلگەندە؛

- بەيتانىس ايماقتا جول تاۋىپ، وعان بەيىمدەلگەندە؛

- بەيتانىس ادامدارمەن قارىم-قاتىناس ورناتىپ بىلگەندە؛

- وزدىگىنەن تابىس تاۋىپ جانە ونى جۇمساپ بىلسە؛

- ورتادا تۋعان كيكىلجىڭدى شەشىپ بىلسە؛

- ءۇي شارۋاشىلىعىن ءوز بەتىمەن ورىنداي السا؛

- ءوز جەڭىسى مەن جەڭىلىسىن دۇرىس قابىلداي بىلسە.

بۇنداي تۇلعالىق باقىلاۋ جالپىعا ورتاق. دەگەنمەن، جاستار تۇگىلى كەيدە جاسى ەلۋدەن اسقان ەل اعالارىنىڭ وزىندە بۇنداي قاسيەتتەر تابىلمايدى.

massaget.kz