جىل باسىنان بەرى تۇرمىستىق گاز بالوندارىن پايدالانۋدان 16 ادام قازا تاپتى
بۇل تۋرالى ۇكىمەت وتىرىسىندا ق ر توتەنشە جاعدايلار ءمينيسترى يۋري يلين ايتتى، دەپ حابارلايدى قازاقپارات ءتىلشىسى.
«ازاماتتاردىڭ قاۋىپسىزدىگىن قامتاماسىز ەتۋدەگى جەكە پروبلەمالى ماسەلە تۇرمىستىق گازدى پايدالانۋمەن بايلانىستى توتەنشە جاعدايلاردىڭ الدىن الۋ بولىپ وتىر. وسى جىلدىڭ باسىنان بەرى گازدى تۇرمىستىق پايدالانۋ نىساندارىندا 51 وقيعا ورىن الىپ، 88 ادام زارداپ شەكتى. ونىڭ 16 سى قازا تاپتى. گاز-تەحنيكالىق ينسپەكسيا قىزمەتىنىڭ قۇقىقتىق نەگىزىن قامتاماسىز ەتۋ ءۇشىن «ازاماتتىق قورعانىس تۋرالى» زاڭعا گاز-تەحنيكالىق ينسپەكسيا قىزمەتكەرلەرىنە گاز تۇتىنۋجۇيەسىنە قىزمەت كورسەتۋدى جۇزەگە اسىراتىن ۇيىمدارعا باقىلاۋجۇرگىزۋ قۇزىرەتىن جۇكتەيتىن ءتيىستى تۇزەتۋلەر ەنگىزىلدى»، - دەدى مينيستر.
ونىڭ اتاپ وتۋىنشە، قازىرگى ۋاقىتتا باقىلاۋدىڭ اتالعان سالاسىنداعى تاۋەكەل دەڭگەيى مەن تەكسەرۋ پاراقتارىن باعالاۋ كريتەريلەرىن بەكىتۋ پروتسەدۋراسى جۇرگىزىلىپ جاتىر. تۇرمىستىق گاز بالوندارىن پايدالانۋعا ءتيىمدى باقىلاۋ ماسەلەلەرىن زاڭنامالىق رەتتەۋ باعىتىندا دا جۇمىس جالعاسۋدا. «حالىقتىڭ ەسكى جانە مەرزىمى وتكەن باللونداردى پايدالانۋى جاعدايدى كۇردەلەندىرىپ وتىر. قاۋىپسىزدىك تالاپتارىن بۇزا وتىرىپ، تاياۋ ماڭداعى اۆتوگاز قۇيۋ ستانسالارىنان باللوندارىن تولتىرا سالۋدى داعدىعا اينالدىرعان»، - دەدى يۋري يلين.
اۆتور: مارلان جيەمباي