نۇر-سۇلتاندا اۋماعى 16 گەكتار بولاتىن جاڭا ساياباق اشىلدى

None
None
نۇر-سۇلتان. قازاقپارات - ەلوردانىڭ سارىارقا اۋدانىنا قاراستى كوكتال-1 ىقشاماۋدانىندا جاڭا ساياباق اشىلدى، دەپ حابارلايدى قازاقپارات.

بۇل جايىندا شاھار باسشىسى التاي كولگىنوۆ مالىمەت تاراتتى.

«نۇر-سۇلتان قالاسىندا ەلوردا تۇرعىندارى مەن قوناقتارى بوس ۋاقىتىن ءتيىمدى وتكىزە الاتىن ورىندار سانى ارتىپ كەلەدى. بيىل قاۋىپسىز جانە جايلى قوعامدىق كەڭىستىكتەر بىرنەشە ەسە كوبەيدى. كارانتين ۋاقىتىندا ولاردىڭ قانشالىقتى قاجەت ەكەنى كورىنىپ-اق تۇردى. كوكتال-1 ەلدى مەكەنىندە 16 گەكتارعا جۋىق ساياباق اشىلدى. جاڭا كەڭىستىك ءۇش ۇلكەن ايماققا بولىنگەن. ءبىرىنشىسى - تىنىش دەمالىس ايماعى. مۇندا، مىسالى، امفي-تەاتر ورناتىلدى - اشىق اسپان استىندا كينوتەاتر ۇيىمداستىرۋعا بولادى. سونىمەن قاتار روتۋندا دا بار. جاستار ۇيلەنۋ تويىن وتكىزە الادى. تىنىش ايماقتا سەرۋەندەۋ جانە دەمالۋ ءۇشىن قولايلى جاعدايلار جاسالعان» دەپ جازدى قالا اكىمى Instagram پاراقشاسىندا.


ونىڭ ايتۋىنشا، ەكىنشى ايماق سپورتپەن شۇعىلدانۋعا ارنالعان. ايماق باسكەتبول، فۋتبول، ۆولەيبول الاڭدارىمەن، تەننيس كورتىمەن، ۆوركاۋت جانە يوگا الاڭىمەن جابدىقتالعان. بارلىق سپورت الاڭدارى قورشالعان.


«ءۇشىنشىسى - بالالارعا ارنالعان دەمالىس ايماعى. وعان مەكتەپ جاسىنا دەيىنگى بالالارعا ارنالعان ويىن الاڭدارى دا كىرەدى. پاركتىڭ ەرەكشەلىگى - ۆەلوجول قوعامدىق كەڭىستىكتىڭ بارلىق پەريمەترى بويىنشا وتەدى، وسىلايشا پاركتىڭ بارلىق ءۇش ايماعىن قامتيدى. سونداي-اق، ولار يتتەردى سەرۋەندەۋگە ارنالعان ارنايى الاڭمەن جابدىقتالعان. ءبىز ساياباقتا اعاشتار وتىرعىزامىز، بولاشاقتا ول ەكوزوننىڭ ءبىر تۇرىنە اينالادى. بەينەباقىلاۋ كامەرالارىن ورناتامىز» دەيدى التاي كولگىنوۆ. ساياباقتىڭ بارلىق ايماعىن قىستا دا پايدالانۋعا بولادى: كونكي، شاڭعى تەبۋ جانە باسقا ويىن- ساۋىق ءتۇرى بار.


«ەلوردانى «نۇر- سۇلتان- تۇرعىندارعا جايلى قالا» ماستەر - جوسپارىنىڭ تۇجىرىمداماسى اياسىندا دامىتامىز. باسىمدىقتاردىڭ ءبىرى - سەرۋەندەۋ مەن سپورتپەن شۇعىلدانۋ ءۇشىن ورىندار قۇرۋ. ءار اۋداندا ءوز تارتىلىس نۇكتەلەرى بولادى» دەپ تۇيىندەدى قالا باسشىسى.

سوڭعى جاڭالىقتار