تارازدا جىلىنا 15 ميلليون ەكسپرەسس- تەست شىعاراتىن زاۋىت سالىنىپ جاتىر

كەشەندە ەكسپرەسس- تەستەر مەن مەديتسينالىق بۇيىمدار شىعارىلاتىن بولادى. جىلىنا 15 ميلليون ەكسپرەسس- تەست، 1,5 ميلليون باقىلاۋ ەرىتىندىسى جانە 50 مىڭعا جۋىق زارارسىزداندىرۋ وراماسىن شىعارۋ جوسپارلانۋدا. ەرالى توعجانوۆ ءوندىرىس جەلىسىن، ءدارى- دارمەكتەر مەن مەديتسينالىق بۇيىمداردىڭ قويماسىن ارالاپ، سەرىكتەستىكتىڭ جۇمىسىن جوعارى باعالادى.

ۇكىمەت باسشىسىنىڭ ورىنباسارى دارىگەرلەرگە جانقيارلىق ەڭبەگى ءۇشىن العىس ايتىپ، مەملەكەت باسشىسى كوروناۆيرۋسقا قارسى ءىس- قيمىل بويىنشا ۇكىمەت پەن دارىگەرلەردىڭ الدىنا ناقتى مىندەتتەر قويعانىن اتاپ ءوتتى.

«ءبىزدىڭ مىندەتىمىز - بارلىق وسى تاپسىرمالاردى ورىنداۋ. بۇل ءۇشىن ءدارى- دارمەكتەردىڭ ەكى ايلىق قورى قالىپتاستى، دەنساۋلىق ساقتاۋ مەكەمەلەرىنىڭ ماتەريالدىق- تەحنيكالىق بازاسى جاڭارتىلۋدا. جامبىل وبلىسىنىڭ شالعاي ەلدى مەكەندەرىن ساپالى مەديتسينالىق كومەكپەن قامتاماسىز ەتۋ ءۇشىن سەگىز موبيلدى كەشەن الىندى، جەدەل جاردەم ستانسياسىنىڭ اۆتوپاركى جاڭارتىلۋدا. مۇنىڭ ءبارى قاجەتتى كومەكتى دەر كەزىندە كورسەتۋگە مۇمكىندىك بەرەدى»، - دەدى ول.

جۇمىس ساپارىنىڭ قورىتىندىسى وبلىستىق اكىمدىكتەگى بەينە- بايلانىس ارقىلى وتكەن كەڭەستە سارالاندى. ايماق باسشىسى بەردىبەك ساپاربايەۆ وڭىردە مەملەكەتتىك باعدارلامالار ءساتتى جۇزەگە اسىرىلىپ جاتقانىن اتاپ ءوتتى. ەل پرەزيدەنتىنىڭ ءاربىر تاپسىرماسىنىڭ ورىندالۋى قاتاڭ باقىلاۋدا.

«سانيتارلىق- ەپيدەميولوگيالىق جاعداي تۇراقتى. مەديتسينالىق مەكەمەلەر كوروناۆيرۋستىڭ ىقتيمال ەكىنشى تولقىنىنا دايىندالۋدا. اتاپ ايتساق، مەديتسينالىق قۇرال- جابدىقتار ساتىپ الىنۋدا. ءدارى- دارمەك قورى قالىپتاستى. قاۋىپتى ۆيرۋسپەن كۇرەسۋگە قوسىمشا دارىگەرلەر تارتىلادى. ءموبيلدى توپتاردىڭ قىزمەتى جاندانا تۇسۋدە»، - دەپ اتاپ ءوتتى وبلىس اكىمى.

بەردىبەك ساپاربايەۆ دەنساۋلىق ساقتاۋ جانە ءبىلىم بەرۋ سالالارىنا قاتىستى ماسەلەلەردى اتاپ ءوتتى. ەرالى توعجانوۆ ولاردىڭ بارلىعى قاراستىرىلاتىنىنا سەندىردى.

«الەۋمەتتىك- ەكونوميكالىق دامۋدىڭ ناتيجەلەرى جامان ەمەس. جۇرگىزىلگەن پروفيلاكتيكالىق شارالاردىڭ ناتيجەسىندە COVID-19 اۋرۋشاندىعى تومەندەدى. ءبىز وسى قارقىنمەن جۇمىس ىستەۋدى جالعاستىرۋىمىز كەرەك»، - دەپ قورىتىندىلادى ەرالى توعجانوۆ.

ەسكە سالساق، جامبىل وبلىسىنا ساپارى بارىسىندا ەرالى توعجانوۆ COVID-19-عا قارسى وتاندىق ۆاكسينا شىعاراتىن زاۋىتتى سالۋ بارىسىمەن تانىستى.