قورعاس ورتالىعى 15- اقپانعا دەيىن جابىلدى

15- اقپانعا دەيىن اتالعان ورتالىق جابىلدى، دەپ حابارلايدى قازاقپارات ءتىلشىسى.

الماتى وبلىسى اۋماعىندا قىتايمەن شەكارالاس 6 كەدەن بەكەتى بار. سولاردىڭ بارلىعىندا قازىر باقىلاۋ كۇشەيتىلگەن. ال «قورعاس» حالىقارالىق شەكارا ماڭى ىنتىماقتاستىق ورتالىعىنىڭ جۇمىسى ۋاقىتشا توقتاتىلدى.

«15- اقپانعا دەيىن «قورعاس» حالىقارالىق شەكارا ماڭى ىنتىماقتاستىق ورتالىعى جابىلدى. قاجەت بولعان جاعدايدا مەرزىم ۋاقىتى ۇزارتىلۋى مۇمكىن»، - دەدى الماتى وبلىسى اكىمىنىڭ باسپا ءسوز حاتشىسى عالىمۇرات جۇكەل.

بۇل كەدەن بەكەتىنە جاي كۇندەرى قازاقستان تاراپىنان 3,5 مىڭ ادام كىرىپ- شىعادى. دەمالىس كۇندەرى ولاردىڭ سانى بەس مىڭعا جەتەدى. جالپى قىتاي حالقى شىعىس كۇنتىزبەسىمەن جاڭا جىلدى اتاپ وتەر ۋاقىتتا بۇل جەر ەكى اپتاعا جابىلادى. ال قازىرگى جاعدايعا بايلانىستى وبلىس اكىمىنىڭ ۇيعارىمىمەن بەكەت جۇمىسى 15- اقپانعا دەيىن توقتاتىلدى.

«ءار بەكەتتە وقشاۋلاۋ بولمەلەرى بار. بولمەلەر 2-3 توسەك ورىن جانە باسقا دا قاجەت زاتتارمەن جابدىقتالعان. سونداي- اق مەديتسينالىق پۋنكتىلەر جۇمىس ىستەپ تۇر. ماماندار وباعا قارسى ارنايى كوستيۋمدەرمەن قامتاماسىز ەتىلگەن»، - دەدى الماتى وبلىسى اكىمىنىڭ ورىنباسارى باتىرجان بايجۇمانوۆ.

اۆتور: سامال قابىشيەۆا