قازاقستاننىڭ كوشى-قون زاڭناماسىن 14 مىڭنان استام شەتەلدىك بۇزعان

بۇل تۋرالى ق ر ءى ءى م كوشى- قون قىزمەتىنىڭ ەرەكشە تاپسىرمالار جونىندەگى اعا ينسپەكتورى باۋىرجان وماروۆ ءمالىم ەتتى، دەپ حابارلايدى قازاقپارات ءتىلشىسى.

«11-18-قازان ارالىعىندا ەلىمىزدە «نەلەگال كوردون» وڭىرلىك وپەارتسياسىنىڭ ەكىنشى كەزەڭى ءوتتى. پوليتسيا قىزمەتكەرلەرى شەتەلدىكتەر تىعىز تۇراتىن ورىنداردى، تۇرعىن ءۇي سەكتورلارىن، قۇرىلىس الاڭدارىن، بازارلاردى، شەتەلدىك ەڭبەك كۇشىن زاڭسىز پايدالاناتىن ۇيىمدار مەن جۇمىس بەرۋىشىلەردى تەكسەرىپ شىقتى. وپەراتسيا بارىسىندا كوشى- قون زاڭناماسىن بۇزۋدىڭ 14116 فاكتىسى انىقتالدى. ونىڭ ىشىندە 10282 شەتەلدىك ەلدە ءجۇرىپ- تۇرۋ مەرزىمىن بۇزعان. سونىمەن قاتار شەتەلدىكتەردىڭ ەڭبەك قىزمەتىمەن زاڭسىز اينالىسۋىنىڭ 3641 فاكتىسى انىقتالدى»، - دەدى ول ىشكى ىستەر مينيسترلىگىندە وتكەن بريفينگ بارىسىندا.

ونىڭ دەرەگىنشە، 613 جۇمىس بەرۋشى شەتەلدىك جۇمىس كۇشىن زاڭسىز پايدالانعانى، 5453 زاڭدى جانە جەكە تۇلعا پوليتسياعا وزدەرىنە شەتەلدىكتەردىڭ كەلگەنى تۋرالى اقپاراتتى دەر ۋاقىتىندا بەرمەگەنى جانە 53 شەتەلدىك قايىر سۇراعانى ءۇشىن اكىمشىلىك جاۋاپكەرشىلىككە تارتىلدى. «سوت كوشى-قون زاڭناماسىن بۇزعانى ءۇشىن ەلدەن شىعارۋ تۋرالى 936 شەشىم شىعاردى»، - دەدى باۋىرجان وماروۆ.

اۆتور: مارلان جيەمباي