رەسەيلىك 14 جىل بويى قازاقستاندا زەينەتاقىنى زاڭسىز الىپ كەلگەن

ق ر ق م قارجى مونيتورينگى كوميتەتىنىڭ باتىس قازاقستان وبلىسى بويىنشا ەكونوميكالىق تەرگەۋ دەپارتامەنتى رەسەي فەدەراتسياسىنىڭ ازاماتىنا قاتىستى الاياقتىق فاكتىسى بويىنشا قىلمىستىق ءىستى قوزعاپ، تەرگەۋ جۇرگىزگەن.

بۇل تۋرالى Tengrinews.kz حابارلايدى.

«بۇل تۇلعا قازاقستان رەسپۋبليكاسىنىڭ ازاماتى بولا تۇرا، 2003 -جىلى ر ف- نا بارىپ، سول مەملەكەتتىڭ ازاماتتىعىن الدى جانە ەكى مەملەكەت اۋماعىندا زەينەتاقى الىپ وتىرعان. بۇل رەتتە ول ەڭبەك جانە حالىقتى الەۋمەتتىك قورعاۋ مينيسترلىگىنىڭ زەينەتاقى تولەمدەرى جونىندەگى مەملەكەتتىك ورتالىعىنا رف ازاماتتىعى بار ەكەندىگىن ادەيى جاسىرىپ، ق ر- دا زەينەتاقى تولەمدەرىن الۋعا قۇجاتتار تاپسىرعان.

وسىلايشا، 2006 -جىلدان باستاپ 14 جىل بويى ايىپتالۋشى ق ر اۋماعىندا زەينەتاقى تولەمدەرىن زاڭسىز الىپ وتىرعان جانە مەملەكەتكە 9,2 ميلليون تەڭگەدەن اسا سوماعا زالال كەلتىرگەن»، - دەلىنگەن كوميتەتتىڭ حابارلاماسىندا.

باتىس قازاقستان وبلىستىق سوتىمەن ول قىلمىستىق كودەكستىڭ 190-بابىنىڭ 1-بولىگى 1-تارماعىندا قاراستىرىلعان قىلمىستى جاساعانى ءۇشىن ايىپتى دەپ تانىلدى، وعان 3 جىلعا باس بوستاندىعىن شەكتەۋ جازاسى تاعايىندالدى.