قاشقاريالىق كەيۋانا 134 جاسقا تولعان تۋعان كۇنىن تويلادى - شەتەلدەگى قازاق ءتىلدى ب ا ق- قا شولۋ

None
None
نۇر- سۇلتان. قازاقپارات - ادەتتەگىدەي، «قازاقپارات» ح ا ا شەتەلدەگى قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.

قاشقارلىق كەيۋانا 134 جاسقا تولعان تۋعان كۇنىن تويلادى - قىتايدىڭ «ورتالىق حالىق راديوسى» (CNR)

قىتايدىڭ قاشقار ايماعىندا تۇراتىن كەيۋانا الىمقان سەيىت 25- ماۋسىمدا 134 جاسقا تولعان تۋعان كۇنىن اتاپ ءوتتى، دەپ جازادى kazakcnr.com سايتى.

اتالعان اقپارات كوزىنىڭ جازۋىنشا، الىمقان سەيىت - قىتايدىڭ قاشقار ايماعى جاڭاشار اۋدانى قۇمشىلىك اۋىلىندا تۇرادى. ءۇش عاسىردىڭ كۋاسى بولعان كەيۋانا 1886 -جىلى 25- ماۋسىمدا تۋعان. بۇل كەزەڭ قىتايدى مانچجۋرلار اۋلەتى بيلەگەن چين پاتشالىعىنىڭ زامانىنا تۋرا كەلەدى. ال الىمقان سەيىتتى 2013 -جىلى قىتايدىڭ قارتتار ۇيىمى ەڭ ۇزاق جاساعان ادام دەپ تانىعان.

«الىمقان سەيىت 1903 -جىلى 17 جاسىندا تۇردى روزىعا تۇرمىسقا شىققان. ءبىراق بالا سۇيە الماعان ەرلى- زايىپتىلار ءبىر ۇل، ءبىر قىز اسىراپ الادى. ۇلى 36 جاسىندا اۋىرىپ قايتىس بولىپ، كوپ ۇزاماي كۇيەۋى تۇردى دا ماڭگىلىك ساپارعا اتتانادى. بۇگىنگى كۇنى الىمقاننىڭ سول جالعىز قىزى تاجىگۇلدەن تاراعان 40-قا جۋىق ۇرپاعى بار ەكەن. جەرگىلىكتى بيلىك قارتتىڭ بيىلعى 134 جاسقا تولعان تۋعان كۇنىن قۇتتىقتاپ، «ماحاببات ماڭگى ەرتەگى» تاقىرىبىنداعى ءىس- شارامەن اتاپ وتكەن. ويتكەنى ءوزىن كوڭىلدى ۇستايتىن كەيۋانا عاشىقتىق جىرلارىن ايتىپ، جۇرتتى كۇلكىگە كەنەلتىپ، ورتاسىن دۋمانعا بولەپ جۇرەتىن بولعان. كەيۋانانى قازىرگى كۇنى وزدىگىنەن ءجۇرىپ- تۇرۋى قيىنداعاندىقتان نەمەرەسى مەن كەلىنى باعىپ، كۇتىپ وتىر. دەگەنمەن دارگەرلەردىڭ ايتۋىنشا، قارتتىڭ دەنساۋلىعى ءالى دە تىڭ، كوزى وتكىر، ەسكە ساقتاۋى، ەستۋ قابىلەتى، تاماققا تابەتى جاقسى. ول ۇيعىر تىلىنەن بولەك، قىتاي تىلىندە جەتىك مەڭگەرگەن»، - دەپ جازادى CNR.

اقپارات كوزىنىڭ دەرەگىنشە، كەيۋانانىڭ ءجۇرىپ- تۇرۋى قيىنداعان سوڭعى جىلدارعا دەيىنگى كۇندەلىكتى تىرشىلىك داعدىسى قاراپايىم بولعان. تاڭعى ساعات 5-6-دا تۇرىپ نامازىن وقىپ، 8-دە تاڭعى اسىن ىشكەن. كەشكى ساعات 10-دا ۇيىقتاپ دەمالعان. شاي ىشكەندى ۇناتپايدى، ونىڭ ورنىنا سالقىن سۋ ىشكەن. نان، قويان ەتىن جەپ، كەسپە، قىرىققابات سورپاسىن ءىشۋدى جاقسى كورگەن. تىرشىلىگىندە ەگىنشىلىكتى كاسىپ ەتكەن كەيۋانا قاۋىن، شابدالى جانە قارا ورىك سياقتى جەمىستەردى جەگەندى ۇناتقان. ال ەڭ سۇيىكتى جەمىسى - كىشكەنتاي، قىشقىل جاسىل ورىك بولعان.

وزبەكستان دۇنيەجۇزىلىك ساۋدا ۇيىمىنا كىرۋى جونىندەگى كەلىسسوزدەردى باستايدى - «ءو ز ا»

اقپاراتتىق اگەنتتىگى وزبەكستان دۇنيەجۇزىلىك ساۋدا ۇيىمىنا قوسىلۋ جونىندە العاشقى قادامدارىن جاساپ ۇلگەردى. وسى ورايدا وزبەكستاننىڭ ۇيىمعا مۇشە بولۋىنا بىرنەشە حالىقارالىق ۇيىمدار قولداۋ كورسەتۋگە دايىن ەكەنىن جەتكىزگەن، دەپ جازادى وزبەكستاننىڭ «ءو ز ا» مەملەكەتتىك اقپاراتتىق اگەنتتىگى.

«د س ۇ- عا قوسىلۋ جونىندەگى كەلىسسوزدەردى وزبەكستان 2020 -جىلدىڭ 7- شىلدەسىندە بىرلەسكەن جۇمىس توبىنىڭ وتىرىسىندا باستايدى. پاندەمياعا بايلانىستى كەزدەسۋلەر بەينەبايلانىس تۇرىندە وتەدى، دەپ حابارلادى ينۆەستيتسيالار جانە سىرتقى ساۋدا مينيسترلىگىنىڭ باسپا ءسوز قىزمەتى. مينيسترلىك حابارىندا «وزبەكستاننىڭ د س ۇ- عا كىرۋ پروتسەسى ماڭىزدى مىندەت بولىپ تابىلادى جانە ەلدىڭ الەۋمەتتىك- ەكونوميكالىق دامۋىنا بايلانىستى كوپتەگەن ماسەلەلەردى جەدەل شەشۋدى تالاپ ەتەدى» دەلىنگەن. بۇعان دەيىن وزبەكستان د س ۇ- نا مۇشە بولسا، ەۋروپالىق وداق ارنايى 5 ميلليون دوللارلىق گرانت بەرۋگە كەلىسىم بەرگەن جانە GSP+ باعدارلاماسى اياسىندا 6 مىڭنان استام تاۋاردى باج سالىعىنسىز يمپورتتاۋعا كومەكتەسەدى. ال ەۋروپالىق وداقتان بولىنگەن 5 ميلليون دوللار قارجى ارال تەڭىزى ايماعىنداعى جوبالاردى ىسكە اسىرۋعا جۇمىلدىرىلاتىنى بەلگىلەنگەن»، - دەپ جازادى «ءو ز ا» اقپاراتتىق اگەنتتىگى.

موڭعوليانىڭ 2021 -جىلعى پرەزيدەنت سايلاۋىنا وكىلدەرىن قوساتىن پارتيالار بەلگىلى بولدى - KAZNEWS

كەلەسى جىلى موڭعوليا پرەزيدەنتىنىڭ كەزەكتى سايلاۋى وتەدى. كونستيتۋتسيا بويىنشا پارلامەنتتەگى پارتيالار پرەزيدەنت سايلاۋىنا ءوز ۇمىتكەرلەرىن ۇسىنا الادى، دەپ حابارلايدى موڭعوليادا تىركەلگەن KAZNEWS اقپاراتتىق پورتالى.

«كونستيتۋتسيانىڭ 31.2- بابىندا «مەملەكەتتىك ۇلى حۋرالدا ورىن العان پارتيا جەكە نەمەسە بىرلەسكەن تۇردە پرەزيدەنتكە ءبىر ادامدى ۇسىنادى» - دەلىنگەن. سوندىقتان موڭعوليا پارلامەنتىنىڭ 2020 -جىلعى كەزەكتى سايلاۋىندا ورىن العان موڭعول حالىق پارتياسى، دەموكراتيالىق پارتياسى، موڭعول حالىق ريەۆوليۋتسياشىل پارتياسى، ح ءۇ ن پارتياسى ۇمىتكەرلەرىن ۇسىنۋعا قۇقىلى. كونستيتۋتسياعا ەنگىزىلگەن وزگەرىستەر بويىنشا «پرەزيدەنتكە 50 جاسقا تولعان، ەل اۋماعىندا كەمىندە 5 جىل تۇرعان، موڭعوليا ازاماتىن التى جىل مەرزىمگە ءبىر رەت قانا سايلايدى»، - دەپ جازادى KAZNEWS پورتالى.

تۇركيانىڭ اۆتوموبيل ونەركاسىبى رەكوردتىق ەكسپورت جاسادى - TRT


تۇركيانىڭ اۆتوموبيل ونەركاسىبى وتكەن ايدا 2 ميلليارد 16 ميلليون دوللارمەن ەڭ كوپ ەكسپورت جاساعان كاسىپورىن بولدى، دەپ جازادى تۇركيا راديو تەلەۆيزيا پورتالى.

«تۇركيا ەكسپورتشىلار ۇيىمىنىڭ ساندى مالىمەتىنە قاراعاندا اۆتوموبيل ونەركاسىبىنەن كەيىنگى ورىندى 1 ميلليارد 425 ميلليون 451 مىڭ دوللارمەن حيميالىق ماتەريالدار مەن ونىمدەرى يەلەندى. ءۇشىنشى كەزەكتى 1 ميلليارد 357 ميلليون 642 مىڭ دوللارلىق ەكسپورتپەن دايىن كيىم جانە كونفەكسيا ونىمدەرى الدى. ماۋسىم ايىندا ەڭ كوپ ەكسپورتتى ارتتىرعان سالا 69,3 پايىزبەن جاڭعاق جانە جاڭعاق ونىمدەرى بولدى. تۇركيانىڭ جالپى ەكسپورتىنىڭ 76 پايىزىن ورىنداعان ونەركاسىپ توبى 15,2 پايىزدىق ارتۋمەن 10 ميلليارد 238 ميلليون 725 مىڭ دوللارلىق ەكسپورت جاسادى. ەكسپورت ەڭ كوپ جاسالعان العاشقى ءۇش ەل قاتارىمەن ءبىر ميلليارد 293 ميلليون دوللارمەن گەرمانيا، ءبىر ميلليارد 13 ميلليون دوللارمەن ۇلى بريتانيا جانە ءۇشىنشى ورىندا 792 ميلليون دوللارمەن ا ق ش بولدى»، - دەپ جازادى TRT.

رەسەي ۋلترادىبىستىق زىمىراندارمەن كۇرەسكە دايىندالىپ جاتىر - «فارس» اقپارات اگەنتتىگى

رەسەي اۋە- عارىش كۇشتەرى قولباسشىلارىنىڭ ءبىرى س-500 جۇيەنىڭ ۋلترادىبىستىق زىمىرانداردى انىقتاپ، ولاردى جويىپ جىبەرۋ مۇمكىندىككە يە ەكەندەرىن مالىمدەدى، دەپ جازادى «فارس» اقپارات اگەنتتىگى.

«رەسەي اۋە- عارىش كۇشتەرى قولباسشىسى سەرگەي سۋروۆيكين: «س-500 جۇيە ايەروديناميكالىق جانە بالليستيكالىق نىسانداردان باسقا، كەز كەلگەن تۇردەگى ۋلترادىبىستىق قارۋدى وڭاي انىقتاپ، جويىپ جىبەرۋ قابىلەتىنە يە. قازىرگى كەزدە الەمدە س-500 جۇيەسىنە ۇقساس جۇيە جوق. س-500 تەحنيكالىق كورسەتكىشتەرى ونى ءبىرىنشى بۋىن عارىش- قورعانىس جۇيەسىنە اينالدىردى»، - دەدى. س-500 - ورتا قاشىقتىق جانە قۇرلىقارالىق بالليستيكالىق زىمىراندارعا قارسى تۇراتىن الىس قاشىقتىق قورعانىس جۇيە. رەسەي قورعانىس مينيسترلىگىنىڭ ايتۋىنشا، بۇل قورعانىس جۇيەسى 2019 -جىلى اۋە- قورعانىس كۇشتەرىمەن سىناقتان وتكىزىلدى جانە بولجامدار بويىنشا 2021 -جىلى رەسەي ارمياسىنا تاپسىرىلادى»، - دەپ جازادى Рarstoday .

اۆتور: باقىتجول كاكەش

سوڭعى جاڭالىقتار