18:46, 28 - اقپان 2021 | GMT +6
مەكسيكادا قارۋلى شابۋىل سالدارىنان 11 ادام قازا تاپتى
مەحيكو. قازاقپارات - مەكسيكانىڭ حاليسكو شتاتىندا بولعان قارۋلى شابۋىل سالدارىنان 11 ادام قازا تاۋىپ، تاعى ەكەۋى جاراقات الدى.
بۇل تۋرالى قازاقپارات Publimetro باسىلىمىنا سىلتەمە جاساپ حابارلايدى.
وقيعا تونالا مۋنيتسيپاليتەتىنىڭ استانالىق گۆادالاحارا اۋدانىندا ورىن العان. پروكۋراتۋرانىڭ مالىمەتىنشە، ءبىر توپ ەر ادام ءۇيدىڭ جانىندا سىرا ءىشىپ تۇرعاندا، سول جەرگە جۇك كولىگىن مىنگەن بەلگىسىز بىرەۋلەر كەلىپ، وق جاۋدىرا باستاعان. قازا بولعانداردىڭ اراسىندا ءبىر ءجاسوسپىرىمنىڭ بار ەكەنى اتاپ وتىلەدى. تاعى ەكى ادام - ءبىر ايەل مەن بالا وق جاراقاتىن العان، ولارعا مەديتسينالىق كومەك كورسەتىلدى.
وقيعا بولعان اۋداندا كۇش قۇرىلىمدارىنىڭ تىكۇشاقتاردىڭ قاتىسۋىمەن ارنايى ءىس- شارالارى جۇرگىزىلۋدە. پروكۋراتۋرا تەرگەۋ ءىسىن باستادى.