جامبىلدا ءال-ءفارابيدىڭ 1150، ابايدىڭ 175 جىلدىعىنا وراي ونلاين بايقاۋلار ۇيىمداستىرىلادى

None
None
تاراز. قازاقپارات - جامبىل وبلىستىق جاستار ساياساتى ماسەلەلەرى باسقارماسى ەلىمىزدەگى توتەنشە جاعدايعا بايلانىستى جاستاردىڭ ۇيدە وتىرعان ۋاقىتىن ءتيىمدى پايدالانۋدى ۇيىمداستىرۋ ماقساتىندا ونلاين جارىستار، دارىستەر مەن باسقا دا وقىتۋ ءىس-شارالارىن وتكىزۋدى قولعا الۋدا، دەپ حابارلايدى قازاقپارات.

اتالعان باسقارما باسشىسى سەرىكبول بەرىكقوجانىڭ بيىل ءساۋىر ايىندا ونلاين تۇردە وتكىزىلەتىن ءىس-شارالاردىڭ جوسپارى بەكىتىلگەنىن جەتكىزدى.

«نەگىزگى جوسپار بويىنشا باسقارمانىڭ الەۋمەتتىك جەلىلەردەگى رەسمي پاراقشالارىندا «Kahoot» ينتەلەكتۋالدى ويىنىنان چەمپيونات ۇيىمداستىرىلماق. وندا جاستارعا ونلاين كەڭەس بەرۋ، حاكىم اقىن اباي قۇنانباي ۇلىنىڭ 175 جىلدىعىنا وراي «ولمەيتۇعىن ءسوز قالدىرعان ارتىندا» اتتى كوركەمسوز وقۋ شەبەرلەرىنىڭ بايقاۋى، ءال-فارابيدىڭ 1150 جىلدىعىنا وراي «الەمنىڭ ەكىنشى ۇستازى» اتتى پوستتار بايقاۋى سىندى شارالار وتەدى»، - دەدى باسقارما باسشىسى.

سونداي-اق، قازاق، ورىس جانە اعىلشىن تىلدەرىنەن وقىتۋ ساباقتارىن ۇيىمداستىرۋ، جاستارعا پايدالى تاقىرىپتاردا موتيۆاتسيالىق كەشتەر مەن لەكتسيالار ۇيىمداستىرۋ، مەديتسينالىق ماسكا تىگۋ، تىگىن ونەرى، اعاش، تەمىردەن بۇيىمدار جاساۋ سياقتى جاستاردى قىزىقتىراتىن شارالاردى ۇيىمداستىرىپ، ونىڭ بەينەجازباسىن يۋتۋب ارناسىنا ورنالاستىرۋ جانە وبلىسقا تانىمال جاس ونەرپازداردىڭ ونلاين-كونسەرتتەرىن ۇيىمداستىرۋ سياقتى شارالار وتكىزۋ جوسپارلانعان.

«باسقارما الەۋمەتتىك جەلىلەردەگى پاراقشالارى ارقىلى سالالىق باسقارمالاردىڭ قاتىسۋىمەن مەملەكەتتىك قولداۋ تەتىكتەرى، جۇمىسپەن قامتۋ، كاسىپكەرلىك، اۋىل شارۋاشىلىعىن قولداۋ، تۇرعىن ءۇي جانە تاعى دا سول سياقتى تاقىرىپتار اياسىندا تىكەلەي ەفير ارقىلى ونلاين كەڭەس بەرۋدى باستادى.

بۇگىندە «مەملەكەتتىك جاستار ساياساتىنىڭ جۇزەگە اسىرىلۋى مەن ۆولونتەرلىك قولداۋ شارالارى»، «COVID-2019» كورونوۆيرۋسىنان ساقتانۋ شارالارى جانە مىندەتتى الەۋمەتتىك مەديتسينالىق ساقتاندىرۋ جۇيەسىنىڭ تيىمدىلىكتەرى» تۋرالى تىكەلەي ەفير ارقىلى ونلاين كەڭەستەر بەرىلدى»، - دەيدى سەرىكبول بەرىكقوجا.

سوڭعى جاڭالىقتار