اۋە اپاتى كەزىندە ءتىرى قالۋدىڭ 10 امالى

ۇشۋعا دەيىن نە ىستەۋ كەرەك؟

1. الىپ ۇشاقتاردى تاڭداڭىز. ەگەر اۆيالاينەردى تاڭداۋ مۇمكىندىگىڭىز بار بولسا، وندا الىپ ۇشاقتاردى تاڭداڭىز. ا ق ش ازاماتتىق اۆياتسيا فەدەرالدى باسقارماسىنىڭ (FAA) زەرتتەۋلەرىنە سۇيەنسەك، ۇلكەن ۇشاقتار اپاتقا ۇشىراعان جاعدايدا كينەتيكالىق ەنەرگيانى كوپ مولشەردە سىڭىرەدى، ال بۇل جولاۋشىلاردىڭ ءتىرى قالۋ مۇمكىندىگىن ارتتىرادى.

2. قاۋىپسىز ورىنداردى تاڭداڭىز. اپات كەزىندە بۇلىنبەيتىن ايماق قاۋىپسىز بولىپ سانالادى. الايدا، اپات كەزىندە ۇشاقتىڭ قاي ايماعى بۇلىنبەيتىنىن الدىن-الا بولجاۋ قيىن. سوندىقتان، اپاتتىق جاعدايدا شىعار ەسىكتىڭ توڭىرەگىندە وتىرعان دۇرىس. گرينۆيچ ۋنيۆەرسيتەتىنىڭ ماتەماتيكالىق مودەلدەۋ پروفەسسورى ەدا گاليدىڭ ايتۋىنشا، اۆيااپاتتاردا ءتىرى قالعانداردىڭ كوبى شىعار ەسىككە جاقىن بەس قاتاردىڭ بىرىندە وتىرعاندار. بۇدان الىس وتىرعانداردىڭ ءتىرى قالۋ مۇمكىندىگى از بولعان.

ەگەر ورنىڭىز شىعار ەسىكتىڭ توڭىرەگىندە بولماسا، وندا وتكەلدىڭ جانىنان ورىن تاڭداڭىز. سىزگە دارەتحاناعا بارۋ وڭاي بولادى، سونىمەن قاتار، يلليۋميناتوردىڭ جانىندا وتىرعاندارعا قاراعاندا ءتىرى قالۋ مۇمكىندىگىڭىز ارتادى.

3. دۇرىس كيىنىڭىز. ۇشاقتارعا جانارماي كوپ قۇيىلادى، سوندىقتان اپات كەزىندە ءورت شىعۋى مۇمكىن. شورتى، بەلدەمشەلەرگە قاراعاندا ەتەك-جەڭى ۇزىن كيىمدەر كيۋگە تىرىسىڭىز. وسىلايشا كۇيىپ قالۋدىڭ الدىن الاسىز. نەيلون مەن باسقا دا سينتەتيكالىق ماتەريالداردان تىگىلگەن كيىمدەر تەز تۇتانادى، سوندىقتان ۇشاققا تابيعي ماتالاردان - ماقتا ماتا، جۇننەن توقىلعان جانە ت. ب. كيىمدەردى كيۋگە تىرىسىڭىز. سونىمەن قاتار اياققا مىعىم تۇراتىن اياق كيىمدەردى تاڭداڭىز. ەگەر جۇگىرۋ قاجەت بولسا، بيىك وكشەلى تۋفليمەن جۇگىرە المايتىنىڭىزدى ەسكەرىڭىز، ال سۇيرەتپەلەر اياعىڭىزدان ءتۇسىپ قالۋى مۇمكىن.

بورتتا بولعاندا:

4. قاۋىپسىزدىك ەرەجەسىن ساقتاڭىز. ۇشاقپەن ءجيى ۇشاتىن ادامدار اپات كەزىندە نە ىستەۋ كەرەكتىگىن بىلمەيتىن بولىپ شىققان. قاۋىپسىزدىك ەرەجەلەرىندە شىعۋ ەسىكتەرى كورسەتىلگەن سحەما بار. ونى دا الدىن الا-ءبىلىپ جانە جاقىن جەردەگى شىعۋ ەسىگى قۇلىپتالعان جاعدايدا باسقا ەسىكتەرگە قالاي جەتۋگە بولاتىنىن ويلاستىرىپ العان ءجون. قاۋىپسىزدىك ەرەجەلەرىن وقي وتىرىپ اپات كەزىندە شىعاتىن جولىڭىزدى ويشا تۇجىرىمداپ الىڭىز.

5. ۇشقاننان كەيىنگى 3 مينۋت جانە قونار الدىنداعى 8 مينۋت. ستاتيستيكا بويىنشا اۋە اپاتتارىنىڭ %80 ى وسى ۇشۋ مەن قونۋ كەزىندەگى 11 مينۋتتا بولادى ەكەن. وسى ۋاقىتتا ۇيىقتاماۋعا تىرىسىڭىز جانە بورتقا ىشىمدىك ءىشىپ كىرمەڭىز. بۇل ەكەۋى دە زەيىن قويۋدى تومەندەتىپ، ارەكەت ەتۋگە كەدەرگى كەلتىرەدى.

6. قاۋىپسىزدىك بەلبەۋىن تاعىپ وتىرىڭىز.

وقىس جاعدايدا:

7. دۇرىس وتىرىڭىز. اپاتتىق جاعدايدا قونۋ كەزىندە قالاي وتىرعاندىعىڭىز، قونعاندا ارتىق جاراقات الۋ-الماۋىڭىزعا اسەر ەتەدى. ەگەر الدىڭعى جاعىڭىزدا ورىندىق بولسا، ونى قولىڭىزبەن قاپسىرا قۇشاقتاپ، ارقاسىنا باسىڭىزبەن جابىسىپ الىڭىز. ەگەر الدىڭىزدا ورىندىق جوق بولسا نەمەسە الىستا بولسا، ەڭكەيىپ، باسىڭىزدى تىزەڭىزگە قويىپ، قولىڭىزبەن جاۋىپ الىڭىز.

8. سالقىنقاندىلىق تانىتىڭىز. بۇل وڭاي بولماسا دا، بايبالامعا سالىنباڭىز. كوپ نارسە وزىڭىزگە بايلانىستى. اپات كەزىندە ۇشقىشپەن بايلانىس ءۇزىلۋى مۇمكىن، ال ستيۋاردەسسالار ءوز قامىمەن جۇگىرۋى مۇمكىن. مۇنداي جاعدايدا ءبارىن ءوز قولىڭىزعا الىپ، تەز ارەكەت ەتىڭىز.

سۋعا قونۋ كەزىندە سۋعا باتىرمايتىن جيلەتتى الدىن-الا كيىپ الۋ ۇسىنىلادى. الايدا مۇنى ۇشاقتان شىققانشا كيمەگەن دۇرىس. الدىن-الا اۋا تولتىرىلعان جيلەت سالوندا ەمىن-ەركىن جۇرۋىڭىزگە كەدەرگى كەلتىرەدى.

9. جۇگىڭىزدى ەمەس، ءومىرىڭىزدى قۇتقارىڭىز. سورەلەردەن جۇك الامىن دەپ ءجۇرىپ ءومىرىڭىز ءۇشىن ماڭىزدى بىرنەشە سەكۋندتى جوعالتىپ الاسىز. سونىمەن قاتار، وزگە جولاۋشىلاردىڭ ۋاقىتىن الاسىز.

10. قاشىڭىز. ورتەنگەن ۇشاق جەرگە كەپ تىرەلگەندە، ونىڭ جارىلۋىنا 90 سەكۋندتاي ۋاقىت قاجەت بولادى. قاۋىپسىز قاشىقتىق - اپات بولعان جەردەن 150 مەتر قاشىقتىق. وسى كەزدە اياق كيىمىڭىزدىڭ ىڭعايلى بولۋى وتە ماڭىزدى. الايدا ۇشاقتان تىم الىس كەتىپ قالماڭىز، قۇتقارۋشىلاردى بايقاماي قالۋىڭىز مۇمكىن.

دايىنداعان: انار مۇستافينا

massaget.kz