پەتروپاۆلدا 101 جاستاعى كەيۋاناعا جاڭا كۋالىك ۇيىنە جەتكىزىلىپ بەردى
س ق و پوليتسيا دەپارتامەنتى باسپا ءسوز قىزمەتىنىڭ مالىمەتىنشە، بيىل ءوڭىردىڭ 700 گە جۋىق ازاماتىنا قۇجات ۇيلەرىنە جەتكىزىلگەن.
«مۇگەدەك، جۇرە المايتىن جانە ەگدە جاستاعى تۇرعىندار ۇيلەرىندە قۇجاتتاندىرىلدى. وبلىستىڭ كوشى-قون قىزمەتىنىڭ ماماندارى «ازاماتتارعا ارنالعان ۇكىمەت» مەملەكەتتىك كورپوراتسياسى» ك ە ا ق قىزمەتكەرلەرىمەن بىرگە وسى ساناتتاعى ازاماتتاردى قۇجاتتاندىرۋ ءۇشىن قالانى عانا قامتىماي، شالعايداعى اۋىلدىق وكرۋگتەرگە دە شىقتى»، - دەيدى س ق و پ د كوشى-قون قىزمەتى باسقارماسىنىڭ باستىعى تالعات ءابىلوۆ.
وسىنداي شالعاي ەلدى مەكەندەردىڭ ءبىرى - ءۋاليحانوۆ اۋدانىنداعى قايرات اۋىلى. ماماندار 101 جاسقا تولعان كوكىل جاقىپوۆاعا قۇجات تاپسىرۋ ءۇشىن ارنايى كەلدى. كەيۋانا جەكە كۋالىكتى 10 جىل بۇرىن العان. بۇگىندە ونىڭ مەرزىمى اياقتالعان ەكەن. بارلىعى 2020 جىلدىڭ باسىنان 30 مىڭعا جۋىق سولتۇستىك قازاقستاندىق جەكە باسىن كۋالاندىراتىن قۇجات الدى.
توتەنشە جاعداي رەجيمى اياقتالعاننان كەيىن وبلىستىق كوشى-قون قىزمەتىنىڭ قىزمەتكەرلەرى 9944 ازاماتقا جەكە كۋالىك پەن پاسپورت رەسىمدەگەن. 600 جۋىق شەتەلدىك جىل باسىنان ق ر تۇراقتى تۇرۋعا ارنالعان رۇقسات پەن ىحتيارحات العان، ولاردىڭ دەنى رەسەي فەدەراتسياسىنىڭ ازاماتتارى.
ءتارتىپ ساقشىلارىنىڭ ايتۋىنشا، توتەنشە جاعداي كەزىندە قۇجات مەرزىمى وتكەن ازاماتتار 10 شىلدەگە دەيىن قۇجاتتارىن اۋىستىرۋ قاجەت.