ەلوردادا قازاق راديوسىنىڭ 100 جىلدىعىنا ارنالعان مۋرال پايدا بولدى

مۋرالدا ماڭگىلىك ەل يدەياسى بەينەلەنگەن، ول قازاق راديوسىنىڭ عاسىرلىق تاريحي ەۆوليۋتسياسىمەن ۇشتاسقان.

«تاۋەلسىزدىكتىڭ 30 جىلدىعى اياسىندا بيىل ءبىرقاتار قوعامدىق- مادەني شارالار جۇزەگە اسىرىلدى. مىسالى، نۇر- سۇلتاندا ءبىزدىڭ راديونىڭ رەداكتسياسىنىڭ جانىنداعى كوشەلەردىڭ ءبىرى «قازاق راديوسى كوشەسى» دەپ اتالدى. ب ا ق قىزمەتكەرلەرىنىڭ كاسىبي مەرەكەسى قارساڭىندا مەملەكەت باسشىسى ق. توقايەۆ 1-قازاندى - راديو قىزمەتكەرلەرى كۇنى دەپ جاريالاۋدى ۇسىندى. ءدال وسى كۇنى، وسىدان 100 -جىل بۇرىن قازاق راديوسى ءوزىنىڭ حابار تاراتۋىن باستادى. ارداگەرلەر مەن راديو قىزمەتكەرلەرى بۇل باستامانى زور قۋانىشپەن قابىلدادى.

مۋرال قالانىڭ كورىكتى جەرىندە، ساۋران مەن سىعاناق كوشەلەرىنىڭ قيىلىسىندا ورنالاسقان. نۇر- سۇلتان قالاسىنىڭ اكىمدىگىنە، ەسىل اۋدانىنىڭ اكىمدىگىنە جانە قالالىق ۋربانيستيكا ورتالىعىنا زور العىسىمدى ايتقىم كەلەدى. بۇل جەر راديو سۇيەر قاۋىم مەن قالا تۇرعىندارى ءۇشىن تاعى ءبىر ايشىقتى ورىنداردىڭ ءبىرى بولادى دەگەن ۇمىتتەمىن»، - دەدى «قازاق راديولارى» ج ش س باس رەداكتورى - «قازاق راديوسى» راديوارناسىنىڭ ديرەكتورى دۋلات ابيبۋللايەۆ.

قازاق راديوسى ورىنبوردان حابار تاراتۋدى 1921 -جىلى حالىق اعارتۋشىسى احمەت بايتۇرسىنوۆتىڭ باستاماسىمەن باستادى جانە قازىر ەل اۋماعىنىڭ %90 - نا حابار تاراتادى. راديونىڭ مەرەيتويى اياسىندا ەلوردادا ءبىرقاتار قوعامدىق جوبالار جۇزەگە اسىرىلدى. مىسالى، بارلىق اۆتوبۋس ايالدامالارى قازاق راديوسىنىڭ كاسىبي ديكتورلارىمەن جانە قوعامدىق ورىنداردا، مۇز ايدىندارىندا جانە ت/ج ۆوكزالدارىندا قازاق راديوسىنىڭ حابار تاراتۋى ۇيىمداستىرىلدى.