باس ءمۇفتي تالدىقورعاندا 1000 ادامعا ارنالعان مەشىتتىڭ ىرگەتاسىن قالادى

قازاقستان مۇسىلماندارى ءدىني باسقارماسىنىڭ (ق م د ب) ءتوراعاسى ناۋرىزباي قاجى تاعان ۇلى الماتى وبلىسىنا جاساعان ءىس-ساپارىندا تالدىقورعان قالاسىنىڭ شىعىس شاعىن اۋدانىندا سالىناتىن 1000 ادامعا ارنالعان مەشىتتىڭ ىرگەتاسىن قالادى. يگى ءىس-شارادا الدىمەن قۇران وقىلىپ، مەشىت قۇرىلىسىنىڭ ويداعىداي اياقتالۋى ءۇشىن دۇعا جاسالدى.

«بۇگىن بارشامىز ساۋاپتى ءىستىڭ كۋاگەرى بولىپ وتىرمىز. جاراتۋشى يەمىز قۇراندا: «اللا تاعالانىڭ مەشىتتەرىن تەك اللاعا جانە اقىرەت كۇنىنە يمان ەتكەن، ناماز وقىعان، زەكەتىن بەرگەن جانە اللادان باسقا ەشكىمنەن قورىقپايتىندار عانا سالادى» دەيدى («ءتاۋبا» سۇرەسى، 18-ايات). مەشىتتىڭ اتقاراتىن قىزمەتى، قوعامداعى ورنى وتە ۇلكەن. مەشىت - رۋحانيات ورداسى، وقۋ- ءبىلىمنىڭ ورتالىعى. سەبەبى مەشىتتەرىمىز تەك قۇلشىلىق جاسايتىن ورىن عانا ەمەس، ءدىني ساۋات اشاتىن، سابيلەرگە ازان شاقىرىپ ات قوياتىن، جاڭادان وتاۋ قۇرعان جاس جۇبايلاردىڭ اق نەكەسىن قياتىن، دۇنيەدەن وتكەن اياۋلى جاندارعا قۇران وقىتىپ، دۇعا باعىشتايتىن، مۇقتاج جاندارعا قايىرىمدىلىق جاسالاتىن، قينالعان ادامدارعا رۋحاني قولداۋ كورسەتەتىن مەيىرىم مەكەنى. وسى مەشىت قۇرىلىسىنا اتسالىسىپ جاتقان بارشا ازاماتتارعا اللا رازى بولسىن! حالقىمىزدىڭ بىرلىگى نىعايىپ، بەرەكەسى ارتا بەرگەي!» دەي كەلە ناۋرىزباي قاجى تاعان ۇلى مەشىتتىڭ ىرگەتاسىن قالادى.

اقساقالدار اتىنان ارىستانبەك بيباتىر ۇلى ءسوز سويلەپ، باس ءمۇفتي باستاعان ق م د ب دەلەگاتسياسىنا باتا بەردى. ايتا كەتەيىك، تالدىقورعان قالاسىنىڭ شىعىس شاعىن اۋدانىنان بوي كوتەرەتىن مەشىت قۇرىلىسى 2024 -جىلدىڭ ساۋىرىندە تولىقتاي اياقتالادى دەپ كۇتىلۋدە.

اۆتور: سامال قابىشەۆا