دەنساۋلىق ساقتاۋ سالاسىنا 1,5 تريلليون تەڭگە كەرەك - ءبىرتانوۆ مەديتسينالىق نىسانداردىڭ توزۋى جايلى

«شىنىندا دا ەسكىرۋ جاعدايى بۇرىننان بار. ءبىزدىڭ ەسەبىمىزشە بۇل ينفراقۇرىلىمدى قالپىنا كەلتىرۋ ءۇشىن زامانعا ساي تەحنولوگيالاردى ەسكەرمەگەننىڭ وزىندە 1,5 تريلليون تەڭگە كەرەك. ياعني 100 پايىزدىق جاراقتاندىرۋ ءۇشىن وراسان زور قاراجات قاجەت. بۇل جەردە البەتتە ەڭ الدىمەن اۋىلدى ايماقتار مەن اۋداندىق اۋرۋحانالارعا قيىن. سەبەبى ول جاقتا ماماندار بەيىمدەلگەن نىسانداردا جۇمىس ىستەۋگە ءماجبۇر»، - دەدى ەلجان ءبىرتانوۆ دەنساۋلىق ساقتاۋ مينيسترلىگىنىڭ Facebook پاراقشاسىندا «حابار 24» ارناسى ءتىلشىسىنىڭ سۇراعىنا جاۋاپ بەرە وتىرىپ.

ءمينيستردىڭ ايتۋىنشا مەملەكەت 2007-2015 -جىلدارى جۇرگىزگەن «100 مەكتەپ - 100 اۋرۋحانا» باعدارلاماسى اياسىندا ينفراقۇرىلىم ەداۋىر جاقسارىپ قالعان. الايدا بۇل رەتتە ارى كەتسە اۋداندىق، وبلىستىق اۋرۋحانالار عانا سالىنعان.

«وكىنىشكە قاراي كوپ بولىك نازاردان تىس قالدى. ال قازىر بۇل جۇمىستى ارى قاراي جالعاستىرۋدىڭ ماڭىزى زور. ەڭ ءبىرىنشى كەزەكتە ورتالىق اۋداندىق اۋرۋحانالاردى بەكەمدەپ، ەكىنشى كەزەكتە وبلىستىق قالالارداعى كوپبەيىندى اۋرۋحانالارعا نازار اۋدارعان ءجون. ونداعى كوپبەيىندى مەديتسينالىق ورتالىقتارعا ءارتۇرلى سالانىڭ ماماندارىن ينتەگراتسيالاي الار ەدىك. بىزدە قازىر وكىنىشكە قاراي اۋرۋ توبىنىڭ ءار تۇرىنە ارنالعان اۋرۋحانا بار. ادام اۋىر جاعدايدا ەمحاناعا تۇسكەن كەزدە ونى ەمدەي الاتىن باسقا اۋرۋحاناعا اپارۋعا تۋرا كەلەدى. مۇنىڭ ارتى ادامدار ءۇشىن ايقىن قاۋىپكە اكەلۋى ىقتيمال»، - دەدى ەلجان ءبىرتانوۆ.

مينيستر كوروناۆيرۋس ينفەكسياسىمەن بەتپە- بەت كەلگەن كەزدە دە قيىندىقتار تۋىنداعانىن ايتادى. «ەپيدەميا كەزىندە ينفەكسيالىق ەمحانالاردىڭ بارى ۇلكەن ارتىقشىلىق بولدى. الايدا كۇردەلى پاتولوگياسى بار، پنيەۆمونيامەن ادامدار تۇسە باستاعان كەزدە ءارتۇرلى ماماندىقتاعى دارىگەرلەردى تارتۋعا تۋرا كەلدى. بىزدەگى ينفەكتسيالىق اۋرۋحانالاردا كومپيۋتەرلىك توموگرافتار دا بولماي قالدى. ال بۇل توموگرافتار دياگنوستيكا جاساۋدا ەڭ كەرەكتى مامان. سول سەبەپتى ءار وڭىردە كوپبەيىندى اۋرۋحانا سالۋدىڭ ماڭىزى زور. بەلگىلى ءبىر اۋرۋمەن تۇسكەن ادامدى باسقا اۋرۋحانالارعا تاسىماي، ءدال سول جەردەگى ماماندار قارايتىنداي جاعداي جاسالۋى ءتيىس. بۇل - الەمدىك تاجىريبە»، - دەپ ءتۇيدى ەلجان ءبىرتانوۆ.

مينيستر وسى سەبەپتى مەملەكەتتىك باعدارلاما اياسىندا ءىرى 20 كوپبەيىندى اۋرۋحانا سالۋ تۋرالى جۇمىس جوسپارى ەنگىزىلگەنىن ءمالىم ەتتى.