كەلەسى 1 -قاڭتاردان باستاپ 1334 اۋىلدا بيۋدجەتتىڭ 4 دەڭگەيى ەنگىزىلەدى

بۇل تۋرالى بۇگىن حالىقپەن ەسەپتىك كەزدەسۋ وتكىزىپ جاتقان ۇلتتىق ەكونوميكا ءمينيسترى رۋسلان دالەنوۆ ايتتى، دەپ حابارلايدى قازاقپارات ءتىلشىسى.

«ەلىمىزدەگى وڭىرلىك ساياسات حالىقتىڭ تۇرىپ جاتقان جەرىنە قاراماستان باسەكەگە قابىلەتتىلىگى مەن تۇرمىس ساپاسىن ارتتىرۋعا باعىتتالعان. وڭىرلەردى دامىتۋدىڭ مەملەكەتتىك باعدارلاماسىن 2020 -جىلعا دەيىن ىسكە اسىرۋدىڭ قورىتىندىسى بويىنشا ۋربانيزاتسيا دەڭگەيى 58 پايىزعا جەتتى. بۇل 2017 -جىلمەن سالىستىرعاندا 0,8 پايىزعا ارتىق. 2018 -جىلى قالالاردا ورتالىق سۋمەن جابدىقتاۋ 94,5، اۋىلداردا ورتالىق سۋمەن جابدىقتاۋعا قول جەتكىزۋ شامامەن 60 پايىزعا ۇلعايدى»، - دەدى ول.

ءمينيستردىڭ دەرەگىنشە، «ديپلوممەن اۋىلعا» جوباسى بويىنشا 4 مىڭنان استام مامانعا تۇرعىن ءۇي الۋ ءۇشىن 13,7 ميلليارد تەڭگەگە بيۋدجەتتىك كرەديت بەرىلدى.

«2018 -جىلدان باستاپ 1062 اۋداندىق ماڭىزى بار قالا مەن حالىق سانى 2 مىڭنان اساتىن اۋىلدىق وكرۋگتە جەرگىلىكتى ءوزىن ءوزى باسقارۋدىڭ دەربەس بيۋدجەتى ەنگىزىلدى. 2020 -جىلعى 1 -قاڭتاردان باستاپ قالعان 1334 اۋىلدا بيۋدجەتتىڭ 4 دەڭگەيىن ەنگىزۋ جوسپارلانۋدا»، - دەدى رۋسلان دالەنوۆ.

مينيسترلىكتىڭ مالىمەتتەرىنە قاراعاندا، ءجوب بيۋدجەتىنىڭ باستى ەرەكشەلىگى - جەرگىلىكتى ماسەلەلەردى شەشۋگە 7,6 ميلليون ازاماتتىڭ قاتىسۋى. ج ءو ب ورگاندارىنىڭ تۇراقتى دامۋى مەن دەربەستىگىن قامتاماسىز ەتۋ ءۇشىن قوسىمشا سالىق جانە باسقا دا تۇسىمدەردى بەرۋ ارقىلى ج ءو ب-تىڭ تابىس كوزىن ارتتىرۋ، اكىمدەر مەن ولاردىڭ اكىمشىلىك قىزمەتكەرلەرىن وقىتۋ جۇمىستارى جۇرگىزىلەدى.

 اۆتورى مارلان جيەمباي