20:49, 19 Қаңтар 2018 | GMT +6
Зейнеп Ахметованың жаңа кітабы жарық көрді
АСТАНА. ҚазАқпарат - Қазақстандық жазушы, Бауыржан Момышұлының келіні, қазақы дәстүрлерді, отбасылық құндылықтарды насихаттаушы Зейнеп Ахметованың жаңа кітабы жарық көрді, деп хабарлайды ҚазАқпарат тілшісі.
«Шуақты күндер» және «Бабалар аманаты» кітаптарымен танылған жазушы «Күретамыр» деп атаған кезекті кітабын бала тәрбиесіне арнап отыр.
«Қазақтың салт-дәстүрі туралы көптеген еңбектерде ұлттық жөн-жоралғылар туралы қысқаша мағлұмат қана берілетін. Зейнеп апаның жаңа кітабында келіннің бойына бала біткеннен, оның дүниеге келуі, өсуі, мүшел жасқа жетуіне дейінгі аралықта жасалатын салт-дәстүр мен ырым-тыйымдар, олардың мән-мағынасы, не үшін жасалатыны кеңінен түсіндіріледі», - деп жауап берді ҚазАқпарат сауалына З.Ахметованың көмекшісі, журналист Айгүл Болатханқызы.
Жаңа кітап 2 мың таралымен, демеушінің қаржысына шығарылған. Кітап дүкендер желісіне әзірге түспегендіктен оны автордың көмекшісінен алуға болады.