00:40, 15 Қазан 2017 | GMT +6
Велоспорт: Асылхан Тұрар Азия кубогында «алтын» еншіледі
ҚЫЗЫЛОРДА. ҚазАқпарат - Үндістанның астанасы Нью - Дели қаласында велоспорттан ерлер арасында өткен Азия кубогында Қызылорда қаласындағы № 3 облыстық велоспорт жөніндегі олимпиадалық резервтің мамандандырылған балалар-жасөспірімдер мектебінің спортшысы Асылхан Тұрар алтын медаль иеленді.
Бұл туралы ҚазАқпарат тілшісі хабарлады.
Ол велоспорттың ең ауыр түрі - омниум жарысында жеңімпаз атанып, еліміздің абыройын асқақтатты. Сондай-ақ, жекелей жарыста қола жүлдені еншілеп, Қазақстан құрамасының қоржынындағы жүлделер санын толықтырды.
А.Тұрар велоспорттан жастар арасында 4 дүркін, ересектер арасында 4 дүркін Қазақстан жеңімпазы. Тайландта жастар арасында өткен Азия чемпионатының жеңімпазы, ҚР халықаралық дәрежедегі спорт шебері.
Оның бапкері жоғары деңгейдегі жоғары санатты жаттықтырушы Жандос Махамбетов.
Енді Асылхан қараша айында өтетін Әлем кубогында топ жаруды көздеп отыр.