Талдықорған-Өскемен тасжолының құрылысы бір айдан кейін басталады

Бұл жөнінде  Инвестициялар және даму министрі Жеңіс Қасымбек Үкімет басшысының жетісулықтармен кездесуі барысында мәлім етті, деп хабарлайды ҚазАқпарат тілшісі.

Аталған жол құрылысы бойынша талдықорғандық тұрғынның сұрағына жауап берген министр, алдымен Талдықорған-Аягөз бағыты бойынша жөндеу жұмыстары басталатынын айтты. Одан кейін жол құрылысы Өскеменге дейін жалғасады. Сондай-ақ ол Үшарал-Достық жолы жөнделетінін жеткізді.

Айта кету керек, Алматы-Талдықорған тасжолы толықтай жаңа талапқа сай етіп жаңартылуда. Аталған жоба аяқталуға жақын. Қазір Талдықорған мен Көксу ауданындағы аралықта  жолдың құрылысы жүріп жатыр. Халық Алматы мен Талдықорған арасына бұған дейін көлікпен кемінде  5 сағаттан астам уақыт жүрсе, қазір 2-2,5 сағаттың ішінде жетуге мүмкіндік туды. «Нұрлы жол» бағдарламасы аясында аталған жоба бойынша тас жолдың 245 шақырымы жаңартылуда.

Естеріңізге сала кетейік, 28 сәуір күні Үкімет басшысы Бақытжан Сағынтаев Алматы облысында жұмыс сапарымен болды. Ол өңір жұртшылығымен кездесіп, Елбасының Жолдауындағы мақсат-міндеттердің орындалуын пысықтады, рухани жаңғыру бағытында атқарылар жұмыстар жөнінде мәлім етті. Премьер-Министрмен бірге облысқа 4 министр келді. Олар  өз салалары бойынша мемлекеттік бағдарламалардың жүзеге асырылу барысын түсіндіріп, тұрғындар тарапынан қойылған сұрақтарға жауап берді.