СҚО-да Есіл өзені арнасынан 9 шақырымға дейін жайылып кетті

Өңірдің басты өзенінің тасуынан қазіргі уақытта Қызылжар ауданы мен Петропавлдың жағаға жақын орналасқан шағын аудандары зардап шегуде. Облыс орталығында төтенше жағдай кеше жарияланды, бүгін Қызылжар ауданында енгізіліп отыр.
 

Жаңа бөгет өзіне жүктелген міндетті әзірге атқарғанымен бұл жерде де су арнасынан асуға таяған. Өткен түні оның бір бөлігінің шайылып кету қаупі туындап, дер кезінде шаралар қолданылды. Әйтпегенде, су басу аумағы бірнеше есе артар еді.
 

Кожзавод ауылындағы Рыжов көшесінің су астында қалған бөлігі қазір Венецияны еске салады. Мұндағы су деңгейі үйлердің терезелеріне жеткен. Шаруашылық жайлар су астында, тіпті, кейбірі техникаларын да алып үлгермеген. Адамдарды «вахтовка» аталып кеткен жүк көліктерімен тасымалдауда. Көптеген адамдар өз өмірлерін қатерге тігіп, үйлерін тастап кетуден бас тартып отыр. Ауылда күндіз-түні құтқарушылар мен полиция қызметкерлері кезекшілікте жүр.
 

Облыс әкімінің айтуынша, су деңгейінің көтерілуі тоқтай сала су басқан аумақтар қоршалып, су сорғыу жұмыстары жүргізіледі. Зардап шеккен аумақтарға бүкіл техника жеткізіліп, комиссия материалдық шығын көлемін есептемек.
 

«Өткен тәулікте су деңгейі тағы 34 сантиметрге көтерілді. Су әлі де көтерілу үстінде. Өзеннің арнасы кей жерлерде 9 шақырымға жетті. Су жазғы деңгейінен 9 метр жоғары. Орасан көп су Сергеев су қоймасынан келді. Облыс бойынша 171 үй су астында қалды, аулалар одан да көп. Бөгетті нығайту жұмыстары түні бойы жүргізілді», - деді облыс әкімі Құмар Ақсақалов.
 

Ең жоғарғы су деңгейі бүгін кешке болады деп күтілуде.