Шымкенттегі қағаз шығаратын жалғыз зауыт шикізат тапшылығынан тоқтап тұр

Өндірісі тұралап қалған «Қағаз шаһары СЭЗ» серіктестігінің басшылығы өткен жылы тығырықтан шығудың жолын өздігінше қарастырды. Дүниежүзінің бірқатар мемлекеттерін аралап, қағаз шығару технологиясын зерттеп шыққан кәсіпорын қызметкерлері қағаз шығаруға қажет қарасора өсімдігін егуді қолға алды. Қара күзде 50 гектар жерге егілген өсімдікті жинап алған зауыт қазір сораның сабанынан қағаз шығаруды жоспарлап отыр.



Бұл шикізат кеңседе қолданылатын қағаз құнын екі есеге дейін төмендетуге мүмкіндік береді. Сала мамандары сондай-ақ бұл өсімдікке дүниежүзінде сұраныс көп екенін айтады. Өйткені қарасорадан тамақ өндірісі, фармацевтика, косметология, тоқыма, құрылыс саласына қажет 25 мың түрлі зат дайындалады. Ал, талшығы кілем өндірісіне қажетті жіп ретінде де өңделеді. Сондықтан серіктестік биылғы жылы егістік көлемін арттырмақ.



«Қазақстанда орман немесе бамбук шаруашылығы жоқ. Ал, қарасора өсіру барлық жағынан тиімді. Әрі бұл өсімдікті қазір шетелдіктер де сұрап жатыр. Брендтік киімдер шығаратын компаниялар да оны көріп, бізбен келісімшартқа отырды. Биыл 600 га алқапқа осы өсімдікті егуге дайындалып жатырмыз»,-дейді «Қағаз шаһары СЭЗ» ЖШС-нің арнайы өкілі Бауыржан Манатов.



Десе де өндірісі бір жылдан бері тоқтап тұрған зауытқа инвестиция қажеттілігі туындаған. Кәсіпорын басшылығы отандық қағаз шығаруға атсалысқысы келетін инвестор болса өндірістің жанданып кететініне сенімді.