«Самұрық-Қазына» қорының басшысы «Тау-Кен Самұрық» кәсіпорнының жұмысшыларымен кездесті

None
None
АСТАНА. ҚазАқпарат - 2016 жылғы 30 қыркүйек. «Самұрық-Қазына» АҚ басқарма төрағасы Өмірзақ Шөкеев Қарағанды облысындағы Алайғыр кен орнында болып, жылына 900 мың тонна кен өңдейтін, соның ішінде 60 мың тонна қорғасын өндіретін кен байыту комбинатының құрылыс жобасымен танысты, деп хабарлайды акционерлік қоғамының баспасөз қызметі.

Жобаның жалпы құны - 238,5 млн. АҚШ доллары.

«Бұл жоба іске қосылса, Қарағанды облысында 550 адамға жұмыс орнын ашуға мүмкіндік туады», - деп атап өтті Ө.Шөкеев

Жоба аясында өңірдің әлеуметтік-экономикалық инфрақұрылымына салынатын жалпы қаражат 180 миллион теңгені құрамақ.

Жобада қорғасын өңдеуде цианидсіз байыту технологиясы қолданылатын инновациялық шешімдер іске асырылады. Оңтайлы техникалық-экономикалық көрсеткіштерге қол жеткізу үшін әлемдік өндірушілердің қазіргі заманғы құрал-жабдықтары пайдаланылатын болады. Жоба қорғасын экспортын ұлғайтуға бағытталған.

Жоба аясында біраз жұмыстар атқарылды: 22 шақырымдық жол салынды, 56,8 мың тонна қорғасын концентратын немесе 32,5 мың тонна қорғасын және 12,7 тонна күміс байытуға болатын технология таңдап алынды.

Тау-кен жұмыстарының дайындығы жүргізіліп, JORC халықаралық классификациясы бойынша қор бағаланды, байыту фабрикасы мен инфрақұрылымның жобасы жасалды.

Сонымен қоса, Ө.Шөкеев Қарағанды қаласындағы «Tau-Ken Temir» ЖШС кремний зауытының жұмысшыларымен кездесті.

Бұл кәсіпорынды қалпына келтіруді 2015 жылы Қордың еншілес компаниясы «Тау-Кен Самұрық» АҚ қолға алған болатын. Зауыттың өндірістік кешенінде екі кенді қыздырып өңдейтін пеш, сондай-ақ электр пештері нарығындағы жетекші неміс компаниялардың бірі SMS SIEMAG жабдықтары бар.

«Кәсіпорынды қалпына келтіргеннен кейін 400 жұмысшыны зауытқа қайта алдық. Зауыт өнімдері Германия мен АҚШ-қа экспортқа жөнелтілетін болады», - деді «Тау-кен Самұрық» АҚ басқарма төрағасы Мәжит Тұрмағамбетов.

«Tau-KenTemir» ЖШС 2016-2017 жылдарға арналған инвестициялық бағдарламаны жүзеге асырып жатыр, ол бойынша қосымша ғимараттар, лабораториялар, шихталық материалдар қоймасын салу, технологиялық құрал-жабдықтарды жаңарту көзделген.

 

Соңғы жаңалықтар