Сақ мәдениеті: «Алтын адам» әлемді аралайды

«Алтын адам» әлем музейлерін аралайды» деп аталатын халықаралық жобаның алдымен ат басын бұрған өңірі - Беларусь Республикасы.

Бұл елдегі ұлттық көркемөнер музейінде Қазақстаннан әкелінген жауһар жәдігерлер қойылды. Көрме ашылмай жатып-ақ жұрт оны әлем өнеріндегі басты шара деп бағалап үлгерді. Беларусь астанасындағы Көркем мұражайдың басты залына қойылған жәдігерлер теңдесі жоқ бірегей.

Мұнда 232 экспонат пен саф алтыннан жасалған 120 әшекей бар. Халықаралық жоба елдің мәдени өміріндегі басты шараға айналды. Өйткені біздің заманымызға дейінгі VII ғасырдағы, яғни темір дәуіріндегі асыл бұйымдар адамзат тарихындағы ең ежелгі жәдігерлер болып саналады.

«Бұлар - түпнұсқалар. Менің ойымша, біздің көрермендер бұл жәдігерлермен алғаш рет танысайын деп отыр. Тіпті бүкіл ТМД елдерінің ішінде бірінші десем де болады. Ал мына «Алтын адам» - көрменің басты жәдігері. Ол қазір қала көшелерінің барлық жарнамалық тақтасында ілініп тұр. Өйткені соған лайық. Сақ алтындары 1969 жылы Алматыға жақын жерде табылды. Сақ көсемінің жерленген орнын әйгілі қазақстандық археолог Кемел Ақышев бастаған экспедиция ашты. Қолбасшының бас және үстіңгі киімінің әшекейлері сол қалпында сақталған. Бұл «Алтын адамды» жинап, құрастыруға мүмкіндік берді», - дейі Беларусь Ұлттық көркем мұражайының жетекші ғылыми қызметкері Алла Гаврилова.