Петропавлда жарыстан шыққан кикбоксшы есінен танып қалды
Спортшы жедел жәрдеммен облыстық ауруханаға жеткізілді. Қазір ол ес-түссіз жатыр. Дәрігерлер спортшының өмірін сақтап қалу үшін бар күштерін салуда. Кикбоксердің ата-анасы Петропавлға келіп қойды.
«Бес раундқа созылған жекпе-жекте Азамат Досымбай жеңіліп қалған болатын. Өзін жайсыз сезінген ол, сәлден соң далаға шығып есінен танып қалды. Қазір спортшы ауруханада медикаментоздық ем алып жатыр, әлі есін жиған жоқ», - деді дене шынықтыру және спорт басқармасының басшысы Руслан Есеналин.
9 желтоқсанда 18-ші «Қызылжар» республикалық турнирінің аясында Кикбоксингтен ҚР кубогының финалы өткен еді. Жарыс соңы халықаралық «Steppe Fighters» мачтық кездесуіне ұласты. Рейтингтік кәсіби жекпе-жектер алаңына Қазақстан, Ресей және Өзбекстанның алты спортшысы шығып күш сынасты.