Оралда жас дәрігерлер бас қосты
Екі жүзден астам жас дәрігер қатысқан шарада облыс әкімінің орынбасары Марат Тоқжановтың атап өткеніндей, еліміз тәуелсіздік алғаннан бергі кезеңде денсаулық саласында да көптеген өзгеріс-жаңалықтар болды. Қазіргі таңда дәрігерлерге өз кәсіби шеберлігін шыңдап, білімін жетілдіруге барлық мүмкіндік бар. Олар «Болашақ» бағдарламасы арқылы шетелде де білім-білігін көтере алады. Әсіресе, жас дәрігерлердің мемлекеттік бағдарламаларды жүзеге асыруға белсене қатысуына жағдай жасап, жан-жақты қолдау көрсетудің маңызы зор. Соңғы жылдары «Дипломмен - ауылға» жобасы аясында дәрігер мамандар ауылдық жерлерге көптеп орналасуда. Осындай игі дәстүрді жалғастыра беру керек.
Облыстық денсаулық сақтау басқармасының басшысы Қамидолла Ирменов әр медицина қызметкері өз орнында білікті әрі сапалы жұмыс жасай білсе, еліміздің одан әрі дамуына қосылған нақты үлес болатындығын жеткізді.
Форумда «Болашақ» бағдарламасы бойынша оқып келгендер мен жас дәрігерлер өз ой-пікірлерімен, тәжірибелерімен бөлісті.
Шара барысында медицина қызметкерлері арасында өткізілген кәсіби байқауда озып шыққан жас мамандар марапатталды. Олардың арасында облыстық перинаталдық орталықтың анестезиолог-реаниматологы Дастан Қазайбеков, облыстық көп бейінді балалар ауруханасының хирургы Камиль Әушенов, Бөкей ордасы аудандық ауруханасының терапеві Ұлболсын Құспанова бар.
Жиын аясында дәрігерлердің күнделікті тыныс-тіршілігін көрсететін фотокөрме ұйымдастырылып, шара соңы концертке ұласты.