09:53, 17 Сәуір 2018 | GMT +6

Мұстафа Шоқай туралы жаңа деректі фильмді әзірлеуге 20 жыл кеткен

ҚЫЗЫЛОРДА. ҚазАқпарат - Көрнекті мемлекет және қоғам қайраткері Мұстафа Шоқай жайында түсірілген «Ардағы еді түркінің» атты деректі фильм көрерменге жол тартты. Жаңа туынды Қызылорда облысының жұртшылығына таныстырылуда, деп хабарлайды ҚазАқпарат тілшісі.

Деректі фильмді дүниежүзілік «Алтын сапран» кинофестивалінің жүлдегері Доқтырхан Тұрлыбек түсірген. Кинолентаны әзірлеуге 20 жыл кеткен.

Фильм барысында тұғырлы тұлғаның өмір жолы толықтай баяндалып, қызмет жолындағы қиындықтары да назардан тыс қалмаған. Туындыда ел көп біле бермейтін деректер қамтылған.

«Осының нәтижесінде саяси қайраткердің бітім-болмысын жан-жақты аша алдық деген ойдамын. Мұстафа Шоқай кешегі соғыс жылдарында 140 мыңнан астам түркі тектес халық өкілдерін неміс тұтқынынан босатуға көмек бергенін тарихтан жақсы білеміз», - дейді режиссер Д.Тұрлыбек.

Бүгінгі күндері Қызылорда облысының бірқатар аудандарында деректі фильмнің тұсаукесері өтті. Жалағаш ауданында өткен шарада жергілікті көрермен туындыны жоғары бағалап үлгерді.

Деректі фильмді орыс, ағылшын және түркі тілдеріне аудару көзделіп отыр.

Әділет ҚАҢТАРБАЕВ

Тегтер:

Қызылорда Алашорда Қазақстан тарихы Қызылорда облысы Басты жаңалық

Соңғы жаңалықтар

Одан да көп жаңалықтар біздің Телеграм-арнамызда!