Минскіде ЕАЭО елдерінің цифрлық жобаларын әзірлеу мәселелері талқыланды
Сапар барысында Дәурен Абаев Беларусь Республикасының «Жоғары технологиялар паркінде» болып, парктің және IT саладағы бизнес-инкубаторлардың жұмысымен танысты. Парк басшылығымен кездесу соңында ЖТП мен «Зерде» холдингінің арысында тығыз ынтымақтастық пен тәжірибе алмасу бойынша келісімге қол жеткізілді.
Бұдан бөлек, министр Байланыс саласындағы өңірлік достастықтың Байланыс әкімшіліктері басшылары кеңесінің 52-отырысына және ТМД-ға мүше мемлекеттердің ақпараттандыру жөніндегі үйлестіру кеңесінің 23-отырысына қатысты.
Байланыс саласындағы өңірлік достастық отырысы шеңберінде Қазақстанның Ақпарат және коммуникациялар министрі Әзербайжан, Ресей, Өзбекстан елдері байланыс әкімшілігінің басшыларымен, сондай-ақ Халықаралық электр байланысы одағының бас хатшысы Х.Чжаомен бірқатар екіжақты кездесулер өткізді.
Сонымен қатар, Дәурен Абаев Еуразиялық экономикалық одақтың Цифрлық күн тәртібін әзірлеу жөніндегі ЕАЭО уәкілетті органдары басшыларының отырысына қатысты. Отырыс барысында тараптар бірлескен цифрлық жобаларды әзірлеу мәселелерін қарастырды.