Маңғыстауда малдардың құтыру дерегі тағы тіркелді

Құтыру диагнозы республикалық ветеринарлық зертханаларға жіберілген 50 малдың сынамасының нәтижесінен кейін қойылды.  Оның 14-і теріс нәтиже көрсеткен. Бұған дейін ветеринарлық бақылау және қадағалау комитетінің мамандары вакцина жасап, сынамаларды Астанаға зерттеуге жіберген болатын.
 

 «Ауыру табылған мал иелеріне өтемақы беріледі. Өтемақы Ауыл шаруашылығы министрінің № 559 бұйрығына сәйкес белгіленеді. Ол үшін адамдар эпизоотиялық отрядқа тиісті құжаттарды тапсыруы тиіс»,- деді МО Ветеринария басқармасы эпизоотиялық қауіпсіздік бөлімінің басшысы Қамбар Момынов.
 

Жұқпалы індетке шалдыққан малдар  Жаңаөзен қаласы мен Мұнайлы, Қарақия және Маңғыстау аудандарынан табылған. Құтыру ауруы үй жануарларына қасқыр, түлкі, қарсақ сияқты жыртқыш аңдар тістеген кезде сілекейінен жұққан деген болжам бар. Сондықтан қазіргі таңда аудан, қала әкімдіктері тарапынан өз аумақтарында жабайы жыртқыш аңдардың санын анықтау жұмыстары да қолға алынған. Оған қоса облыс тұрғындарына мал ұстау, бағу және ветеринариялық заңнамаларда көзделген тәртіпте өз міндеттерін орындау туралы түсіндіру жұмыстары жүргізілуде.

Еске сала кетейік, бұған дейін Маңғыстау облысында жан-жануардың құтыру ауруы бойынша 5 дерек анықталғандығы туралы хабарлаған болатынбыз.