Қызылордада ҚР IV Жастар спорт ойындары басталды

Төрт жылда бір мәрте ұйымдастырылатын айтулы додаға Астана, Алматы қалалары мен облыстардан спортшылар спорттың 35 түрінен бақ сынайды.

Мақсаты - жастардың спортқа деген қызығушылығын арттыру, бұқаралық спортты дамыту, салауатты өмір салтын насихаттау және жоғары білікті спортшыларды іріктеу.

 

Бағдарлама аясында Қызылордада гандбол және тоғызқұмалақ жарыстары өтуде. Тоғызқұмалақ 10 сәуірге, гандбол ойындары 12 сәуірге дейін жалғасады. Жастар ойындарына қатысушыларды облыстық мәслихат хатшысы Наурызбай Байқадамов, ҚР Спорт және дене шынықтыру істері комитетінің төрағасы Елсияр Қанағатов құттықтады.

 

Спорт ойындарының алауын жағу құрметіне ауыр атлетикадан жасөспірімдер арасында Әлем чемпионатының қола жүлдегері Евгений Ломанов, дзюдодан жастар арасында Олимпиада чемпионы, әлем чемпионы Мағжан Шамшадин, дзюдодан жасөспірімдер арасында тұңғыш Әлем чемпионы Бауыржан Жауынтаев ие болды.

 

Сайыстарды әділ жүргізуге төрешілер атынан тоғызқұмалақтан жоғары ұлттық дәрежедегі төреші, ҚР еңбек сіңірген жаттықтырушысы, жарыстың бас төрешісі Айнұр Жақапбаева, спортшылар атынан каратэ-додан әлем чемпионы Мөлдір Жаңбырбай ант берді.

 

Жастар ойындары республиканың барлық аймақтарында шілде айына дейін жалғасып, бірінші шілдеде Ақтөбе қаласында теннис жарыстарымен жабылу салтанаты өтеді.