Қызылордада экономикалық қылмыс бойынша айыпталған екі кәсіпкер ұсталды
Департаменттің бас маманы Бақыт Орданованың келтірген деректеріне сүйенсек, кәсіпкер Л.Б. және оның серігі Ж.Э.-ның алдын ала келісім бойынша 2016 жылдың тамыз айы мен 2017 жылдың мамыр айы аралығында екі жауапкершілігі шектеулі серіктестік арасында жалпы сомасы 386 млн 643 мың теңгенің шот-фактуралары ұсынылған. Алайда ешқандай нақты тауар алынбаған.
Мемлекетке ірі көлемді залал келтірілетін бұл әрекет ҚР ҚК 24-бабының 3-бөлігімен және 216-бабының 2-бөлігі 2, 3 тармақтарымен қарастырылған қылмыстық құқықбұзушылық болып танылады.
Мемлекеттік кірістер департаменті мамандарының талдау есептеріне сәйкес, шот-фактураларды алған заңды тұлға осы шот-фактураларды қолданған жағдайда, бюджетке түсетін 110 млн 469 мың теңге салықтан жалтаруға негіз болар еді.
Экономикалық тергеу қызметі қылмыстық топтық жоспары аяғына дейін жеткізбей, екі күдіктінің бір-біріне 55 млн теңге беруі кезінде ұстады.
Қазіргі кезде бұл іс ҚР Қылмыстық кодексінің 216-бабы 2-бөлігі 2-тармағы бойынша сотқа жолданды.