11:15, 26 Сәуір 2018 | GMT +6
«Қызылорда-Жезқазған» автожолын жөндеу жұмыстары қашан басталады
АСТАНА. ҚазАқпарат - «Қызылорда-Жезқазған» жолы құрылысына қаржы 2020 жылы бөлінеді. Бұл туралы Парламент Сенатының жалпы отырысында «2018-2020 жылдарға арналған республикалық бюджет туралы» заң жобасын талқылау барысында ҚР Инвестициялар және даму министрі Жеңіс Қасымбек мәлім етті, деп хабарлайды ҚазАқпарат тілшісі.
Отырыс барысында министрден 427 шақырым болатын «Қызылорда-Жезқазған» автожолын жөндеу жұмыстары қашан басталатындығы сұралды.
«Бүгінгі күні Қазақстан бойынша 4 мың шақырым республикалық маңыздағы жолдарда құрылыс жұмыстарын жүргізіп жатырмыз. Оған қомақты қаржы бөлінді. Оның негізгілері арасында «Нұрлы жол» бағдарламасына енген үш бағыт бар. Ал келесі жобалардың тізіміне «Қызылорда-Жезқазған» жолы кіреді. Бұл жобаларға бюджетті 2020 жылдан бөлеміз деп көздеп отырмыз. Қазір бюджетте мұндай мүмкіндік жоқ», - деді Жеңіс Қасымбек.
Бұдан бұрын хабарланғандай, осы жол учаскесін салу жұмыстарына шамамен 3 жыл кететіні айтылған еді.