22:38, 08 Сәуір 2017 | GMT +6
Қол шамы түріндегі жарылғыш затқа қатысты тараған ақпарат жалған - ҚР ІІМ
АСТАНА. ҚазАқпарат - Соңғы уақытта әлеуеттік желіде тараған қол шамы түріндегі бомбаларға қатысты хабарламалар шындыққа сай емес. Бұл жайында ҚР Ішкі істер министрлігі Мемлекеттік тіл және ақпарат департаментінің директоры Алмас Садубаев өзінің Фейсбуктегі парақшасы арқылы мәлім етті, деп хабарлайды ҚазАқпарат.
«Әлеуметтік желіде қол шамына жасырынған бомбалардың көшелерде тасталғандығы туралы ақпарат таралуда. Белгісіз адам ресми дереккөзіне сүйене отырып, қол шамдарының жарылу қаупі бар элементтермен жабдықталғандығын айтуда. Ішкі істер министрлігі бұл ақпараттың жалған екендігін мәлімдейді. Арандатушылар анықталып, қылмыстық жауапкершілікке тартылады», - деп жазды Алмас Садубаев.
Сонымен қатар ол Қазақстан азаматтарын дүрбелеңге түспеуге және қарапайым қауіпсіздік шараларын сақтап, көшедегі, қоғамдық көлік пен адамдар көп жиналатын орындағы күдік тудырған адамдар мен заттар жайында полицияға жедел хабар беруге шақырады.