Қазақстандағы ірі қара мал басы ашығып жүр - Қайрат Айтуғанов
«Облыстар мен аудандар бойынша есептей келе, бүгінде еліміздегі мал басы ашығып жүргенін байқадық. Осы орайда бұл ірі қарадан ет пен сүт өнімділігін талап ету орынсыз. Себебі мал басы тиісті деңгейде жемделмеген. Тәулігіне бір жануар 9 бірлік азық өлшемі (осымен жем-шөптің жұғымдылығы мен энергетикалық құнарлығы анықталады) деңгейінен кем емес тұтынуы тиіс. Бүгінде жеке шаруашылықтардағы мал басына 2,9 бірлік азық өлшемі беріледі, яғни үш есе аз. Осындай көрсеткішпен ет пен сүт өндіру жайында айту қиындау. Ал ұйымдастырылған шаруашылықтарда 5,2 бірлік азық өлшемімен қамтылған. Атап айтқанда, бұндай көрсеткіштер жануарлардың ашығып жүргенін білдіреді»,-деді Қайрат Айтуғанов.
Оның сөзіне қарағанда, ет пен сүттің құрылымына назар аудару керек, яғни өзіндік құнында 70 пайызға дейінгі көлемін жем-шөп құрайды.
«Егер жем-шөпті өндіру деңгейін арттырмасақ, арзан ет пен сүтке қол жеткізу мүмкін емес»,-деп түсіндірді бірінші вице-министр.