Елордадағы жәрмеңкеге ақтөбеліктер 300 тонна өнім әкеледі
Ақтөбе облысы ауылшаруашылығы басқармасының берген мәліметіне сүйенсек, ақтөбеліктер жәрмеңкеде 300 тонна ауылшаруашылығы өнімдерін ұсынбақ.
Жәрмеңкеге 6 аудан мен Ақтөбе қаласынан 50-ден астам ауылшаруашылығы тауар өндірушілері мен қайта өңдеумен айналысатын кәсіпорындар қатысады.
Жәрмеңкедегі өнімдердің бағасы Астана қаласы базарларының бағасынан 10-15% төмен болады. Жеткізілген өнім қатарында еттің барлық түрі - 124 тонна, картоп және көкөніс -26 тонна, сүт өнімдері - 27 тонна, өсімдік майы - 15 тонна, жұмыртқа - 21 мың дана бар. Сондай-ақ, шұжық және консерві өнімдері және жылыжай өнімдері ұсынылады.
Сондай-ақ бірқатар қайта өңдеу кәсіпорындарының сүт өнімдері, қымыз, шұбат, ешкі сүті, ұн, макарон өнімдерін сатып алуға болады.
Іс-шара Ақтөбе облысының биші, әнші әртістерімен ұйымдастырылған концерттік бағдарламамен қатар өткізіледі.