Ел азаматтарының шетелде құқықтарын тиімді қорғайтын құжат қабылданды

«Қазақстан азаматтарының шетелде жеке отбасылық және іскерлік мүдделерін құқықтық қорғауды жетілдіру бойынша Елбасының тапсырмасын іске асыру аясында Халықаралық жеке құқық жөніндегі Гаага конференциясының жұмысына қатысу ұсынылып отыр. Ұйымға мүшелік Гаага конференциясының Жарғысын ратификациялау арқылы жүзеге асырылады. Бүгінде бұл ұйымға 81 мемлекет және Еуропалық одақ кіреді. Аталған халықаралық ұйымның мақсаты - халықаралық жеке құқық нормаларын біріздендіру, осы саладағы мемлекеттердің ынтымақтастығына жәрдем көрсету»,-деді ҚР Әділет министрі Марат Бекетаев заң жобасы бойынша баяндамасында.

Оның сөзіне қарағанда, Гаага конференциясының аясында 39 конвенция жасалған. Олар азаматтық іс жүргізу аясында құқықтық көмек көрсетуге бағытталған. Қазақстанның Гаага конференциясындағы халықаралық заң шығарушылық жұмысына тікелей қатысуы шетелде біздің азаматтардың құқықтарының неғұрлым тиімді қорғалуын қамтамасыз етеді.

«Ұйымның негізгі органдары -  Жалпы істер және саясат бойынша кеңес пен Дипломатиялық өкілдер кеңесі. Бұл органдар өз шешімдерін консенсус негізінде қабылдайды, яғни барлық қатысушы мемлекеттер ұстанымын есепке алуға мүмкіндік беріледі»,-дейді министр.

Айта кетейік, бұл  бағыттағы қадамдар біздің мемлекет үшін жаңа халықаралық шарттарды жасасуға, ұйымның басқа мүшелерінің жеке азаматтық құқық саласында ынтымақтастықты дамытуға, халықаралық деңгейде өз мүдделерін қорғауға мүмкіндік береді.

Сөз соңында ол Гаага конференциясының Жарғысында Қазақстан Конституциясына қайшы келетін нормалар жоқ екенін, ұйымға қосылу жыл сайынғы мүшелік жарнаны (6850 еуро) төлеуді көздейтінін атап өтті. Бұл шығыстар ҚР Сыртқы істер министрлігінің тиісті бюджеттік бағдарламасында көзделген.