10:22, 20 Қаңтар 2018 | GMT +6
Дрон алғаш рет суға ағып бара жатқан балаларды құтқарды
АСТАНА. ҚазАқпарат - Австралия жағалауларында ұшқышсыз ұшатын құрылғы суға ағып бара жатқан екі жеткіншекті құтқарды, деп жазады ВВС.
15 және 17 жастағы жасөспірімдер Оңтүстік Уэльс штатының Леннокс-Хед жағажайынан қауіпті аумаққа өтіп кеткен. Олар жағалаудан 700 метр алыстап кетіп, биіктігі 3 метр болатын толқындарға тап болған. Оларды алғаш болып демалушылар байқаған.
Құтқарушылар бірден дронның көмегіне жүгінген. Дрон суға ағып бара жатқандардың үстінен құтқару құралдарын тастаған. Соның арқасында жасөспірімдер жағаға аман-есен жеткен.
Оңтүстік Уэльс штатының премьер-министрінің орынбасары Джон Бариларо бұл оқиғаны тарихи деп атады.
«Бұған дейін ешқашанда адамдарды құтқару жұмыстарына дрон пайдаланылмады. Бұл алғаш рет болды», - деді ол.