Димаштың екі тілде орындаған өз әні Азия рейтингінің үштігіне енді

«Ұмытылмас күн» Д.Құдайбергеннің О.Байсеңгірдің сөзіне жазылған төл туындысы. Оны әнші қазақ және қытай тілдерінде шырқады.  

Аталмыш композиция «Азияның жаңа әндері» рейтингінде 73826 ұпай жинап, 3-орынға, ал байқау барысында орындаған өзге әндері - «All By Myself» пен «Дайдидау» сәйкесінше 16-ыншы және 29-орындарға ие болды.

 

Бұған дейін Димаштың «Singer» байқауының түрлі кезеңдерінде орындаған «Қоңыр күз», «Uptown Funk», «Adagio» мен «SOS d'un terrien en détresse» әндері де осы рейтингтен көрінген еді.

Айта кетерлігі, «Азияның жаңа әндері» рейтингіне әншінің бір мезгілде үш әні ғана ене алады.

«Азияның жаңа әндері» рейтингі азиялық әншілердің Қытайдағы танымалдылығына байланысты жасалып отырады. Онда әндердің тыңдалымы, ақылы түрде жүктеп алынуы бойынша ұпайлар беріліп, рейтинг құрылады. Ол әр 10 минут сайын жаңаланып, жыл соңында жылдың ТОП-рейтингі жарияланады.

Еске сала кетейік, қазақстандық жас талант «Singer» байқауының барлық 10 іріктеу-кезеңінен өтіп, жалпы есепте бірінші болып финалға жолдама алды. Ақтық бәсеке 8 және 15 сәуір күндері өтеді.