Айсұлтан Назарбаев Қазақстан футбол федерациясының вице-президенті болды
Бұл туралы ҚФФ ресми сайтында хабарланды.
«2017 жылдың 28 ақпан күні Қазақстан футбол федерациясы Атқарушы комитетінің шешімімен ФИФА, УЕФА халықаралық ұйымдары және Ұлттық қауымдастықтармен байланыс бойынша вице-президент міндетін атқарушы қызметіне Айсұлтан Назарбаев тағайындалды», делінген хабарламада.
Айсұлтан Назарбаев 1990 жылы туған. Ұлыбританияның Royal Military Academy Sandhurst оқу орнын бітірген. КИМЭП университетінің магистратурасын «бизнес-әкімшілендіру» мамандығы бойынша тәмамдаған. Әскери борышын Жамбыл облысындағы Отар стансасына таяу жердегі әскери бөлімде, Қорғаныс министрлігінің бас барлау басқармасында өтеген.
2016 жылы астаналық «Рахат» клубының сапында екі матч өткізген, сондай-ақ Қазақстан жасөспірімдер құрамасы құрамында Европа-2006 чемпионатының іріктеу турниріне қатысқан.
Студент шағында Англияның «Челси» және «Портсмут» жастар командаларында ойнаған. «Портсмут» сапында өнер көрсеткен жылдары жастар арасындағы Англия чемпионатының қола жүлдесін жеңіп алған.