18:35, 15 Сәуір 2017 | GMT +6
Ауғанстан билігі: Ең алып бомба ислам мемлекетінің 90 содырының көзін жойды
АСТАНА. ҚазАқпарат - АҚШ-тың авиасоққысы салдарынан «Ислам мемлекеті» тобының кем дегенде 90 содыры көз жұмды, оларға ел арсеналындағы ядролық емес қуатты бомбалардың бірі қолданылды, деп хабарлады Би-би-сиге Нангархар провинциясындағы ауғандық Ачин ауданының губернаторы Исмаил Шинвари.
Оның айтуынша, бейбіт азаматтар арасында құрбандар жоқ.
Ауғанстанның премьер-министрі Абдулла Абдулла атап өткендей, соққы ауғандық билікпен бірлесіп, азаматтық тұлғаларға зиян келтірмеу үшін аса сақтықпен жасалды.
Бұл ретте Би-би-сиге жергілікті тұрғындардың бірі жарылыс салдарынан бірнеше үйдің жойылғанын хабарлады. Ол сондай-ақ қуатты жарылыс «түнгі аспанды жарықтандырып жібергенін» айтты.
GBU-43/B MOAB бомбасының ұзындығы тоғыз метр, салмағы 10 тонна, "бомбалардың атасы" деген атпен белгілі. Алғаш рет 2003 жылы қолданылды, одан бұрын соғыс жағдайында қолданылмаған.