15:05, 17 Қаңтар 2018 | GMT +6
«АрселорМиттал Теміртау» жұмысшыларының жалақысын көтеру мәселесі 26 қаңтарға дейін шешіледі
ҚАРАҒАНДЫ. ҚазАқпарат - «АрселорМиттал Теміртау» АҚ-ның болат департаменті және көмір департаментінің жерасты топтары жұмысшыларының жалақысын көтеру мәселесі 26 қаңтарға дейін шешіледі, деп хабарлайды «ҚазАқпарат» ХАА тілшісі.
«1 қаңтардан бастап «АрселорМиттал Теміртау» АҚ көмір департаменті жерасты топтарының және «Өркен» ЖШС Атасу темір рудасы кенішінің жұмысшыларының тарифі мен айлық еңбекақысы 30 процентке көтеріледі. Бұдан тыс, ұжымдық шартқа сәйкес, жалақы 3,55% мөлшерінде индекстеледі», - дейді компания баспасөз қызметіндегілер.
Көмір департаментінің жерүсті жұмысшыларының, «Өркен» ЖШС, болат департаменті және оның басқа да қосалқы функциялар жұмысшыларының жалақысы грейдтік жүйеге сәйкес 30 процентке дейін көтеріледі.