19:05, 15 Қазан 2017 | GMT +6
Алматыда жаңадан салынған тұрғын үй өртенді
АЛМАТЫ. ҚазАқпарат - Алматыда жаңадан салынған көп қабатты тұрғын үйдің бірінде пəтер өртенді, деп хабарлайды ҚазАқпарат тілшісі.
Алматы қалалық ТЖД-ның ресми өкілі Сандуғаш Баймұхамбетованың айтуынша, Құрманғазы көшесінің бойындағы тұрғын үйдің екінші қабатындағы пəтердің өртеніп жатқаны туралы хабарлама 16:16-де түскен.
«Алғашқы өрт сөндіру бригадасы оқиға орнына 6 минутта жеткен.132 пəтерден қою түтін шығып жатқан. Өрт сөндірушілер тілсіз жаумен күресе отырып адамдарды құтқарды»,- деді Сандуғаш Баймұхамбетова.
Өрт болған үйден 54 адам оның ішінде 20 бала қауіпсіз жерге көшірілді.
Мамандардың айтуынша, қызыл жалын лоджияның 6 шаршы метр аумағын шарпыған.
Өрттен ешкім жапа шеккен жоқ.